ގެއްލިގެން ހޯދަމުންދަނީ ދ. މީދޫ "އަލަމާ5" ނަމަކަށް ކިޔާ ދޯންޏެކެވެ. މި ދޯނީގައި ދަތުރު ކުރަމުން ދިޔައީ ދިވެހި ފިރިހެނަކާއި ދެ ބިދޭސީންނެވެ.
ދޯނީގެ ކެޕްޓަން އާދަމް ޝަފީގުގެ ރައްޓެއްސެއް ކަމަށްވާ އަލީ ރަޝީދު ބުނީ ދޯނި އަޑިއަށްދާކަމަށް އޭނާއަށް ގުޅާފައި، ބުނެފައިވަނީ ރޭ 9:58 އެހާކަށްހާއިރު ކަމަށެވެ.
ފުއްސަރު ކައިރިން މިދޯނި އަޑިއަށްދާ ކަމުގެ މަޢުލޫމާތު ލިބިގެން އެމްއެންޑީއެފްގެ ކޯސްޓްގާޑުން ހަރަކާތްތެރިވާން ފަށައިފައިވާ ކަމަށް އެމްއެންޑީއެފް ވަނީ ބުނެފައެވެ.
މިހާދިސާގެ މަޢުލޫމާތު އެމްއެންޑީއެފް ކޯސްޓްގާޑަށް ލިބިފައިވަނީ ރޭ 23:22 ހާއިރުއެވެ.
މި ދޯނި ދަތުރުކުރަމުން އައީ ފީއަލީން ފުރައިގެން މާލެ އަށެވެ. އެމްއެންޑީއެފުން ބުނެފައިވަނީ އެދޯނި ފުއްސަރުގެ ހުޅަނގުދެކުނުން ހަތަރު ވަރަކަށް ނޯޓިކަލް މޭލު ބޭރުން ދިޔަވާކަމަށް މައުލޫމާތު ލިބިފައިވާކަމަށެވެ.
ދޯނި ގެއްލުނު ކަމަށް ބެލެވޭ ސަރަހައްދު
އަލީ ރަޝީދު ބުނިގޮތުގައި އެދޯނި އައީ ފީއަލީ ކައިރިން ފާނަ މަސްވެރިކަމުގައި އުޅޭ ދޯނިފަހަރުން ފާނަ ގަނެގެން މާލެއައް އައުމަށް ދަތުރު ކުރަމުން ކަމަށެވެ.
