އެހެންނަމަވެސް އަދިވެސް އެދޯނިން ދަތުރުކުރި 3 މީހުންގެ ތެރެއިން އެއްވެސް މީހަކު ފެނިފައެއް ނުވެއެވެ. ދ މީދޫ އަށް ނިސްބަތްވާ އެދޯނިން ދަތުރު ކޮށްފައިވަނީ ދިވެހި ފިރިހެނަކާއި، ބިދޭސީ 2 ފިރިހެނުންނެވެ.
ދޯނީގެ ކެޕްޓަން އާދަމް ޝަފީގުގެ ރައްޓެއްސެއް ކަމަށްވާ އަލީ ރަޝީދު ބުނީ ރޭ 9:58 އެހާކަށްހާއިރު އާދަމް ޝަފީގު ފޯނުން ގުޅާފައި، ދޯނި އަޑިއަށްދާ ކަމަށާއި ސަލާމަތް ކޮށްދިނުމަށް އެދޭކަމަށް ބުނެފައިވާ ކަމަށެވެ.
އެމްއެންޑީއެފްއިން ބުނީ ރޭ 11:22 އެހާކަށް ހާއިރު އަލީ ރަޝީދު އެމްއެންޑީއެފްއަށް މިހާދިސާ ރިޕޯޓް ކޮށްފައިވާ ކަމަށެވެ.
ވ.ފުއްސަރު ކައިރިން ދޯއްޏެއް އަޑިއަށް ދާކަމުގެ މައުލޫމާތު އަލީރަޝީދު ހިއްސާ ކުރުމާއި، ގުޅިގެން އެމްއެންޑީއެފް ކޯސްޓްގާޑުން ވަގުތުން ހަރަކާތްތެރި ވަމުންދާ ކަމަށާއި، މިހާރު ދޯނީގެ ބައެއް ބައިތަކާއި، ސާމާނުތަށް ފ. އަތޮޅުގެ ސަރަހައްދު ތަކުން ފެނިފައިވާ ކަމަށް އެމްއެންޑީއެފް އިން ބުނެއެވެ.
އަލީ ރަޝީދު ބުނިގޮތުގައި އެދޯންޏަކީ ފީއަލީ ކައިރިން ފާނަ މަސްވެރިކަމުގައި އުޅޭ ދޯނިފަހަރުން ފާނަ ގަނެގެން މާލެއަށް އައުމަށް ދަތުރު ކުރަމުން ދިޔަ ދޯންޏެކެވެ.
