އެ ތަފާސް ހިސާބުތަކުން ދައްކާގޮތުގައި ވޭތުވެދިޔަ ދެއަހަރުތެރޭ ބޭރަށް ހިންގުން ރިޕޯޓު ނުކުރާ މިންވަރަށް މިއަހަރުގެ ހަފްތާއެއް ތެރޭ ވަނީ ރިޕޯޓު ކޮށްފައެވެ.
މިބަލި އެހާ ކުޑަދުވަސްކޮޅެއްގެ ތެރޭގައި ފެތުރިގެން ދިޔަ ސަބަބާއި ބެހޭގޮތުން ވާހަކަ ދައްކަވަމުން ޑރ، ފައިސަލް ވިދާޅުވީ، ބައެއް ކަހަލަ ބޭރަށް ހިންގުމުގެ ޖަރާސީމު ތަކަކީ އޭގެ އިންކިއުބޭޝަން ޕީރިއަޑު( އަލާމާތްތައް ފެންނަން ފަށާ މުއްދަތު) ވަރަށް ކުރު ޖަރާސީމު ތަކެއް ކަމަށެވެ.
މިހާރު ރާއްޖޭގައި ހަލުވި ކަމާއެކު ފަތުރެމުންދާ ބޭރަށް ހިންގުމުގެ ބަލި ޝައްކު ކުރެވެނީ ނޯރޯ ވައިރެސްއެއްގެ ގޮތުގައި ކަމަށާއި، ނޯރޯ ވައިރެސްގެ ސަބަބުން ޖެހޭ ބޭރަށް ހިންގުމުގެ ބަލީގެ އަލާމާތްތައް ފެންނަން ފަށާ މުއްދަތު ވަރަށްވެސް ކުރުވާނެ ކަމަށެވެ.
އެގޮތުން ބަލީގެ އަލާމަތްތައް 12 ގަޑިއިރުގެ ތެރޭގައި ފެންނަން ފަށާނެ ކަމަށާއި، އެ ބަލީގެ އަލާމާތްތައް ހަށިގަނޑުގައި ދެމިހުންނާނީވެސް ވަރަށް ކުރު މުއްދަތަކަށް ކަމަށެވެ.
ބަލީގެ އަލާމަތްތަކީ
- ހޮޑުލުން
- ބޭރަށް ހިންގުން
ޑރ. ފައިސަލް ވިދާޅުވީ، ބަލިޖެހޭ މުއްދަތު ކުޑަނަމަވެސް ބަލިޖެހޭ ދުވަސްތެރޭ މީހާއަށް އަސަރުކުރާ މިންވަރު ވަރަށް ބޮޑު ކަމަށެެވެ. އެގޮތުން ހަށިގަނޑުން ވަރަށް ބޮޑަށް ވަރުދެރަވެ މުޅި ގައިގާ ރިއްސާ ހޮޑުލެވޭތީ އުޅެެންޖެހޭ ކަމަށެވެ.
މިފަދަ ބަލިތަކަކީ އެކަމަށް ހާއްސަ ފަރުވާއެއް ހުންނަ ބަލިތަކެއް ނޫންކަން ފާހަގަ ކުރައްވަމުން ޑރ. ފައިސަލް ވިދާޅުވީ ބޭރަށް ހިންގުމަށް އޮންނަނީ މައިގަނޑު އެއް ފަރުވާ ކަމަށެެވެ. އެއީ ލޮނު ޕެކެޓު ބޭނުންކުރުންކަމަށެވެ.
ޑރ. ފައިސަލް ވިދާޅުވީ، ފެތުރެމުންދާ ބޭރަށް ހިންގުމުގެ ބައްޔަކީ ގިނަ މީހުންނަށް އެހާ ބޮޑުވަރުނުވެ ކުރު މުއްދަތެއްގެ ތެރޭ ރަނގަޅުވާ ބައްޔެއް ނަމަވެސް މި ބަލީގައިވެސް ފަސް އަހަރު ނުވާ ކުޑަކުދިންނަށާއި، ދުވަސްވީ މީހުންނާއި ތަފާތު އެކި ބަލިތައް ތަހައްމަލުކުރާ މީހުންގެ އިތުރުން ދިފާއީ ނިޒާމް ބަލިކަށި މީހުން އަދި މާބަނޑު މީހުންނަށް ބޮޑުވަރުވެދާނެ ކަމަށެވެ.
އެހެންކަމުން އެފަރާތްތަކުން ވީހާވެސް އަވަހަކަށް ލޮނު ޕެކެޓުން ފަރުވާ ހޯދުމަށް ޑރ. ފައިސަލް އިލްތިމާސް ކުރެއްވިއެވެ.
