ކުޑަކުދިންގެ އޮމްބަޑްސްޕާސަންސްގެ އޮފީހުން ނެރުނު ބަޔާނެއްގައި ބުނެފައިވަނީ، ދައުލަތުގެ ބެލުމުގެ ދަށަށް ގެނެވޭ ކުޑަކުދިން ބެލެހެއްޓުމަށް ހުންނަ ތަންތަން އަލިފާނުގެ ހާދިސާތަކުން ސަލާމަތް ކުރުމަށް ހުންނަން ޖެހޭ ތަކެތި ބެހެއްޓުމަށް ގާނޫނުން ލާޒިމް ކުރިނަމަވެސް މިފަދަ ތަކެތި އެތަންތާ ނުހުންނަ ކަމަށެވެ.
އަދި ތަފާތު އެތައް ސަބަބު ތަކަކާއި ހެދި ކުޑަކުދިންގެ ހިޔާ އަކީ ކުދިން ބެއިތިއްބުމަށް އެކަށީގެންވާ ތަނެއް ނޫން ކަމަށް ޖެންޑާ މިނިސްޓްރީއަށް އެއޮފީހުގެ ފަރާތުން މީގެ ކުރިން އެންގި ނަމަވެސް އެކަމަށް ސަމާލުކަން ނުދީ ކުދިން ބައިތިއްބަމުން ގެންދާ ކަމަށްވެސް ކުޑަކުދިންގެ އޮމްބަޑްސްޕާސަންސްގެ އޮފީހުން ނެރުނު ބަޔާނެއްގައި ބުނެފައި ވެއެވެ.
މީގެ އިތުރުން ބަޔާނުގައި ބުނެފައިވަނީ، އަލިފާނުގެ ހާދިސާތަކުން ކުޑަކުދިންނާއި، ތަން ރައްކާތެރިކުރުމަށް ބޭނުންވާނެ ފިޔަވަޅުތައް ތަނުގައި ނެތުމަކީ، އެއީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ 124 ވަނަ މާއްދާގައި ބަޔާންކޮށްފައިވާ ކުޑަކުއްޖަކާ މެދު އިހުމާލުވުމުގެ ކުށްކަމަށް ގަބޫލުކުރާތީ، ވިލިމާލޭގައި ހުންނަ ކުޑަކުދިންގެ ހިޔާގައި މިދިޔަ މޭ އަދި ޖޫން މަހު ހިނގާފައިވާ އަލިފާނުގެ ހާދިސާތަކާ ގުޅިގެން، މަރުކަޒުގެ މަސްއޫލު މަގާމުތަކުގައި ތިބި މުވައްޒަފުން ޖަވާބުދާރީކުރުވޭނެހެން ޖިނާއީ ތަހުގީގެއް ހިންގައިދިނުމަށް، ފުލުހުންގެ ކިބައިން އެދިފައިވާނެ ކަމަށް އެބަޔާނުގައި ވެއެވެ.
އެބަޔާނުގައި ވާގޮތުން އެފަދަ އިންތިޒާމުތައް ތަނުގައި ނެތުމަކީ، ކުޑަކުދިންގެ ހައްގު ރައްކާތެރި ކުރުމުގެ ގާނޫނުން ކުޑަކުދިންނަށް ކަށަވަރުކޮށްދީފައިވާ، ދިރިހުރުމުގެ ހައްގާއި، ކުދިންގެ މަސްލަހަތަށް އިސްކަންދީ މަސްލަހަތު ހިމާޔަތްކުރުމުގެ ހައްގާއި، ހެދިބޮޑުވުމަށް ބޭނުންވާ ރައްކާތެރިކަން ލިބުމުގެ ހައްގަށް އުނިކަން އަންނާނެ ފަދަ އަމަލެކެވެ.
އަދި މިފަދަ ކަންކަން ތަކުރާރުވިޔަ ނުދިނުމަށް އަޅަން ޖެހޭ ފިޔަވަޅުތަކާ ގުޅޭ ގޮތުން ނުވަ އިރުޝާދެއް އެއޮފީހުގެ ފަރާތުން މިނިސްޓްރީއަށް ހުށައަޅާފައި ވާނެ ކަމަށްވެސް ބަޔާނުގައި ވަނީ ފާހަގަ ކޮށްފައެވެ.
މިދިޔަ އަހަރުގެ މެއި މަހުން ފެށިގެން ޖޫން މަހާއި ހަަަމަޔަށް ކުޑަކުދިންގެ ހިޔާގައި ހިނގާފައިވާ އަލިފާނުގެ ހާދިސާތައް ބަލައި ތަނުގެ ވެރިންނާއިމެދު ފިޔަވަޅު އެޅުމަށް ފުލުހުންގެ އިދާރާގައި އެދިފައިވާއިރު މިދިޔަ އަހަރުގެ ތެރޭގައި އެތަނުގައި ވަނީ ގިނަ އަލިފާނުގެ ހާދިސާތަކެއް ހިނގާފައެވެ. އޭގެތެރޭގައި އެތަނުގައި ކުދިން ހަަމަނުޖެހުން ހިންގާ ބައެއް ފަހަރުތަކުގައި ރޯކޮށްލާފައިވެސް ވެއެވެ.
މިދިޔަ އަހަރުގައި އެކި ފަހަރުމަތިން ހިޔާއިން ވަނީ އަލިފާނުގެ ހާދިސާތައް ރިޕޯޓުކޮށްފަ-----ފޮޓޯ: ސީއެންްއެމް
އެގޮތުން މެއިމަހު 4 ވަނަ ދުވަހު ކުޑަކުދިންގެ ހިޔާ ގައި ހިނގި އަލިފާނުގެ ހާދިސާ އާބެހޭ ތަހުގީގެއް ހިންގުމަށް ކުޑަކުދިންގެ ހައްގުތަކަށް މަސައްކަތް ކުރާ ޖަމިއްޔާ އެޑްވޮކޭޓިން ރައިޓްސް އޮފް ޗިލްޑްރެން (އާކް) އިން ވެސް ސަރުކާރަށް ގޮވާލާފައިވެއެވެ.
މެއި މަހުގެ ތެރޭގައި ތަކުރާރުކޮށް އެތަނުގައި އަލިފާނުގެ ހާދިސާތައް ހިނގަމުން ގޮސް އެންމެފަހުން ސެޕްޓެމްބަރު މަހުގެތެރޭގައި ބައެއް ކުދިން ބޭރަށް ނުކުމެ ފުރާޅު މައްޗަށް އަރައި ނުކިޔަމަންތެރިކަން ދައްކާތާ 24 ގަޑިއިރު ފަހުން އެތަނުގައި ވަނީ ރޯ ވެސް ކޮށްލާފައެވެ.
