ޔާމީން ރަޝީދުގެ ހަށިގަނޑުގެ 34 ތަނަކަށް ވަޅިން ހަމަލާދީ އޭނާ މަރާލި މައްސަލާގައި ކުށް ސާބިތުވާކަމަށް ހުކުމްކުރީ ހައިޝަމް އާއި ޒިހާންގެ މައްޗަށެވެ.
މި ދެ މީހުންގެ މައްޗަށް ކުށް ސާބިތުކުރުމަށްފަހު އަދަބު ކަނޑައެޅުމަށް ބޭއްވި މަޖިލީހުގައި ޔާމީންގެ ބައްޕަ ފިޔަވައި ހުރިހާ ވާރިސުން ބައިވެރިވެފައިވެއެވެ. ޔާމީންގެ ބައްޕަ ބޭނުންވީ ގާތިލުންގެ ކިބައިން މަރަށް މަރު ހިފުމަށެވެ. ނަމަވެސް ޔާމީންގެ މަންމަ ބޭނުންވީ މަރުގެ ދިޔަ ނެގުމަށެވެ.
އެހެން ކަމުން ކްރިމިނަލް ކޯޓުން ވަނީ މި ދެމީހުން އުމުރު ދުވަހަށް ޖަލަށް ލުމަށާއި، އެއް އަހަރު ދުވަސް ތެރޭ 1.3 މިލިއަން ރުފިޔާ ސިވިލް ކޯޓަށް ދެއްކުމަށް ހުކުމް ކޮށްފައެވެ.
މީގެ އިތުރުން ކުށުގެ ކައްފާރާގެ ގޮތުން 60 ދުވަހު ރޯދަ ހިފުމަށްވެސް މި މީހުންގެ މައްޗަށް ވަނީ ހުކުމް ކޮށްފައެވެ.
ދައުލަތުން މީގެކުރިން ކޯޓުގައި ބުނެފައިވަނީ ޔާމީން ރަޝީދު މަރާލީ އޭނާއަކީ އިސްލާމް ދީނާއި ކީރިތި ރަސޫލާއަށް ފުރައްސާރަކުރާ މީހެއް ކަމަށް ދެކިގެން ކަމަށާއި، އޭނާއަށް ހަމަލާ ދީފައިވަނީ ދީނީ ގޮތުން ހައްދުފަހަނަ އަޅާފައިވާ ބައެއްކަމަށެވެ. އަދި ޔާމީން ރަޝީދު ދިރިއުޅޭ ގޭގެ ސިޑި ގޮޅީގައި އޭނާގެ ގައިގެ 30 ތަނަކަށް ވަޅި ޖަހާ މަރާލީ ހައިޝަމާއި ޒިހާން ކަމަށާއި، އެވަގުތު އެގޭގެ ބޭރުގައި ފާރައަށް ހުރީ ދަޢުވާލިބޭ އިސްމާއިލް ރަޝީދު ކަމަށް ވެސް ދައުލަތުން ވަނީ ޝަރީއަތުގައި ބުނެފައެވެ.
