ސީއެންއެމްގެ "ތަފްސީލް" އަށް ދެއްވި ހާއްސަ އިންޓަވިއު އެއްގައި ސަނީފް ވިދާޅުވީ، ކާޑެއްދޫ އެއާޕޯޓަކީ ދުވާލަކު އެތައް ބަޔަކު ބޭނުން ކުރަމުން އަންނަ އެއާޕޯޓެއް ކަމަށާއި، އެހެން ނަމަވެސް އެއާޕޯޓްގެ ހާލަތު ވަނީ ވަރަށް ބޮޑަށް ދަށަށް ގޮސްފައި ކަމަށެވެ.
އެގޮތުން ރަންވޭގެ އެތައް ތަނެއްގައި ރެނދު ލާފައި ވާކަމަށާއި، އޭވިއޭޝަން ގާނޫނު ބުނާ ގޮތުން ނަމަ އެތަނުގައި މިހާރު ފްލައިޓް ޖެއްސުންވެސް ހުއްދަ ނުވާނެ ކަމަށެވެ.
މީގެ އިތުރުން ސަނީފް ވިދާޅުވީ، ކޯޓުުން އެއާޕޯޓް ހިންގުން ވިލާ އާއި ހަވާލު ކޮށްފައި ވީނަމަވެސް އެކުންފުނިން އެތަނާއި ހަވާލު ނުވާ ކަމަށެވެ. އަދި މިކަމުގެ ސަބަބުން ތަނުގެ ތަރައްގީ އާއި މުވައްޒަފުންގެ ކަންކަމަށް ހުރަސް އެޅެމުން އަންނަ ކަމަށާއި، ވިލާއިން އެއާޕޯޓާއި ހަވާލު ނުވާނަމަ ސަރުކާރުން އެއާޕޯޓާއި ހަވާލުވާން ވެސް ސަނީފް ވަނީ ގޮވާލާފައެވެ.
ސަނީފް މިފަދައިން ވިދާޅުވެފައި ވާއިރު، މިއަދު ހެނދުނުގެ ވަގުތެއްގައި ކާޑެއްދޫ އެއާޕޯޓްގެ ޖެޓީ އިން ބޮޑުބައެއް ވަނީ ފަޅުތެރެއަށް ވެއްޓިފައެވެ. ކާޑެއްދޫ ޖެޓީ އިން ގާތްގަނޑަކަށް 100 އެއްހާ މީޓަރުގެ ތަންގަނޑެއް ވަނީ ވެއްޓިފައެވެ.
އެއާޕޯޓުގެ ޖެޓީ ވެއްޓިފައި ވާއިރު، އެމްޓީސީސީން ވަނީ މިއަދު އެ ރަށަށް ގޮސް ޖެޓީން ވެއްޓިފައިވާ ބަޔާއެކު ޖެޓީގެ ވަގުތީ މަރާމާތު ކުރުމަށް ބޭނުންވާ ސާވޭ ކުރުމުގެ މަސައްކަތް ފަށާފައެވެ.
