އެޗްއީއޯސީގެ ނޫސްވެރިންގެ ބައްދަލުވުމުގައި ކޮވިޑްގެ ކޭސްތައް މަތިވަމުންދާ މިދަނޑިވަޅުގައި ފިޔަވަޅުތައް އިތުރަށް ވަރުގަދަ ނުކުރާ ސަބަބާއި ބެހޭގޮތުން ކުރެވުނު ސުވާލަކަށް ޖަވާބުދެއްވަމުން ޑރ. އަފްޒަލް ވިދާޅުވީ، ކޮންމެ ފަހަރަކު ހަދާ ތަފާސް ހިސާބުތަކުންވެސް އެނގޭ އެއްކަމަކީ ކޮވިޑުގެ އެންމެ ބޮޑު އުމުރުފުރާއަކީ 17 އަހަރާއި 40 އަހަރާއި ދެމެދުގެ މީހުން ކަމަށާއި އެ އުމުރުފުރާގެ މީހުންނަކީ އެންމެ ގިނައިން ކޮވިޑް ޖެހުނު އުމުރުފުރާ ކަމަށެވެ.
އެހެންކަމުން ކޮވިޑް ބަލި އެންމެ ގިނައިން ޖެހިފައިވާ ކަމަށް ދައްކަނީ ޒުވާނުން ކަން ފާހަގަކުރައްވަމުން ޑރ. އަފްޒަލް ވިދާޅުވީ، އެންމެ ގިނައިން މަގުމަތީގައި އުޅެނީވެސް އެއުމުރު ފުރާގެ މީހުން ކަމަށާއި ތަންތަން ބަންދުކުރިނަމަވެސް ޒުވާނުންގެ އެ ގްރޫޕް މަގުމަތީގައި އުޅޭނަމަ ކޮވިޑް ކޮންޓްރޯލެއް ނުވާނެ ކަމަށެވެ.
ޑރ. އަފްޒަލް ވިދާޅުވީ، އެމީހުން އަބުރާ ދާނީ ގޭގެއަށް ކަމަށާއި އޭގެ ސަބަބުން ކުޑަކުދިންނަށާއި އުމުރުން ދުވަސްވީ މީހުންނަށާއި އެގޭގައި ދިރިއުޅޭ އެންމެނަށް ބަލި ޖެހޭ ކަމަށެވެ. އެހެންކަމުން "މައިގަނޑު ގުރޫޕަށް"(ޒުވާނުންނަށް) ޖެހޭކަމަށް ވާނަމަ ސްކޫލުތަށް ބަންދުކުރުމުގެ ބޭނުމެއް ނޯންނާނެ ކަމަށް ޑރ. އަފްޒަލް ވިދާޅުވިއެވެ.
