މި އުސޫލުގައިވާގޮތުން ހަނގުރާމަވެރި ސަރަޙައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން، ކަމާބެހޭ ގާނޫނުތަކުގައިވާ ގޮތުގެ މަތިން ރާއްޖޭގައި ރަޖިސްޓްރީ ކޮށްފައި ނުވާނަމަ، އެ ކުދިންގެ އުފަންވުން، އެ އުސޫލުގައި ބަޔާންކޮށްފައިވާ ގޮތުގެ މަތިން ދިވެހިރާއްޖޭގައި ރަޖިސްޓަރީ ކުރަން ވާނެއެވެ.
އެފަދަ ކުއްޖެއްގެ އުފަންވުން ރަޖިސްޓަރީ ކޮށްދެވޭނީ، އެ ކުއްޖަކީ ، ދިވެހި ރައްޔިތަކަށް އުފަން ދަރިއަކު ކަމާމެދު ގޮތެއް ކަނޑައެޅުމަށް ޓަކައި، ޓެރަރިޒަމް މަނާ ކުރުމުގެ ގާނޫނުގެ 5-60 ވަނަ މާއްދާގެ ދަށުން ކޯޓަށް މައްސަލަ ހުށަހަޅައި، އެ ކުއްޖެއްގެ އުފަންވުމާމެދު ކޯޓުން ގޮތެއް ކަނޑައެޅުމުންނެވެ.
އެ ގާނޫނުގެ ދަށުން ކޯޓުން ނިންމާ ނިންމުން ލިބޭތާ ހަތަރު ދުވަހުގެ ތެރޭގައި އެ ކުއްޖާގެ ބެލެނިވެރިޔާ، ނުވަތަ ބެލެނިވެރިޔާގެ ޕަވަރ އޮފް އެޓާނީ އެއް މެދުވެރިކޮށް ކަނޑައަޅާ ފަރާތަކުން އެ ކުއްޖެއްގެ އުފަންވުން ރަޖިސްޓަރީ ކުރުމަށާއި އުފަންދުވަހުގެ ސެޓުފިކެޓު ހެދުމަށް، އެ އުސޫލުގައި ހިމަނާފައިވާ ފޯމު މެދުވެރިކޮށް އެ ކުއްޖެއްގެ މަންމަ ނުވަތަ ބައްޕަ ރަށްވެހިވެފައިވާ ރަށެއްގެ ނުވަތަ ސިޓީ އެއްގެ ކައުންސިލަށް ހުށަހަޅަންވާނެ ކަމަށް އެ އުސޫލުގައި ބުނެއެވެ.
އެއުސޫލުގައި ބުނާ ގޮތުން ހުށަހަޅާ ހުށަހެޅުމެއްގައި އެންމެހައި ކަންކަން ފުރިހަމަ ވާނަމަ، ގާނޫނުގައި ބުނެފައިވާ މުއްދަތުގެ ތެރޭގައި، ކޯޓުގެ ނިންމުމުގައި ބަޔާން ކޮށްފައިވާ މައުލޫމާތުގެ މައްޗަށް ބިނާކޮށް، އެ ކުއްޖެއްގެ އުފަންވުން، އެ ކައުންސިލަކުން ރަޖިސްޓަރީ ކޮށްދޭންވާނެ އެވެ.
