ހޯމް މިނިސްޓްރީން މިއަދު ނެރުނު އިއުލާނެއްގައި ވަނީ ގަވައިދުން ނެރެމުން ނުދާ 52 ނޫސް މަޖައްލާއެއް ފާހަގަކޮށްފައެވެ. މީގެ ތެރޭގައި ބައެއް ނޫސް މަޖައްލާތައް ތަކުރާރުކޮށް ރަޖިސްޓްރީކޮށްފައިވެސް ވެއެވެ. މިއިން ކޮންމެ ނޫސް މަޖައްލާއަކުން ނޫސްތައް ނެރެފައިވަނީ ދުވާލަކު އެއް ފަހަރު އެވެ.
މިނިސްޓްރީގެ އިއުލާންގައި ވާގޮތުން ޤާނޫނުގެ ދަށުން 2019 ޑިސެމްބަރު 31 ގެ ނިޔަލަށް އެ މިނިސްޓްރީގައި ރަޖިސްޓްރީކޮށްފައިވާ ނޫސް، މަޖައްލާ އަދި އޮންލައިން ނޫސްތަކުގެ ތެރެއިން ގަވާއިދުން ޝާއިއުނުކުރާ ނޫސް، މަޖައްލާ، އޮންލައިން ނޫސްތައް ގަވާއިދުން ނުނެރޭނަމަ 28 ފެބްރުއަރީ 2022 އިން ފެށިގެން އެ ނޫސްތައް ނޫސްމަޖައްލާގެ ދަފްތަރުން އުނިކޮށް އުވާލާނެ އެވެ.
ގަވާއިދުން ނެރެމުން ނުގެންދާ ނޫސް މަޖައްލާތަކުގެ ލިސްޓުގައި ހިމެނޭ ފާހަގަކޮށްލެވޭ މަޖައްލާތައް
- މޯލްޑިވްސް އިންޑިޕެންޑެންޓް
މި ނޫހަކީ 2020 ވަނަ އަހަރުން ފެށިގެން ނެރުން ހުއްޓާލާފައިވާ ކުރީގެ މިނިވަން ނޫހެވެ. މި ނޫސް މަޖައްލާ ރަޖިސްޓާ ކޮށްފައިވަނީ 2014ވަނަ އަހަރުގެ ނޮވެމްބަރު މަހުގެ ނުވަވަނަ ދުވަހުއެވެ.
- ސަރުކާރު ހަބަރު
މިއީ ރައީސް އޮފީހުން ރަޖިސްޓްރީކޮށްފައިވާ ނޫސް މަޖައްލާއެކެވެ. މި ނޫސް މަޖައްލާ ރަޖިސްޓާ ކޮށްފައިވަނީ 2016ވަނަ އަހަރުގެ މާޗު މަހުގެ 23ވަނަ ދުވަހުއެވެ.
މީގެ އިތުރުން އުވާލާ ލިސްޓުގައި އެކި އަތޮޅުތަކާއި ރަށްރަށުގެ ނަން ނަމުގައި ރަޖިސްޓްރީކޮށް ނޫސް މަޖައްލާތައް ހިމެނެއެވެ. މި ނޫސް މަޖައްލާތަކުން ޝާއިއުކުރަމުން ދަނީ ދުވާލަކު އެއް ފަހަރު ކަމަށް މިނިސްޓްރީން ފާހަގަކޮށްފައިވެއެވެ. މިފަދަ ނޫސްތަކުގެ ގޮތުގައި ފަސް ނޫހެއް ހިމެނެއެވެ.
ހޯމް މިނިސްޓްރީގެ ނޫސް މަޖައްލާތަކުގެ ދަފްތަރުގައި މިހާރުވެސް 268 ނޫހެއް ހިމެނެ އެވެ. އޭގެ ތެރެއިން ގިނަ ނޫސް މަޖައްލާތައް މިހާރު ވަނީ ޝާއިއުކުރުން ހުއްޓާލާފައެވެ.
