އާރަށް މައްސަލައިގައި ރައީސް ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާ އެވެ. މި ދައުވާތައް އުފުލާ ކްރިމިނަލް ކޯޓަށް ޕީޖީ އޮފީހުން އެމައްސަލަ ހުށަހެޅީ މިދިޔަ އަހަރުގެ ނޮވެމްބަރު މަހުގެ 24 ވަނަ ދުވަހުއެވެ.
މި މައްސަލަ އާ ގުޅިގެން މިއަދު ކްރިމިނަލް ކޯޓުގައި ކުރިއަށްދިޔަ ޝަރީއަތުގައި ރައީސް ޔާމީންގެ މައްޗަށް ކުރާ ދައުވާތައް ދައުލަތުގެ ފަރާތުން ވަނީ އިއްވާފައެވެ.
އެމްއެމްޕީއާރުސީ މެދުވެރިކޮށް އާރަށުގައި ރިސޯޓެއް ތަރައްގީ ކުރަން ކުއްޔަށް ދޫކުރުމުގެ މުއާމަލާތާ ގުޅިގެން ރައީސް ޔާމީނަށް ދައުވާ ކުރަނީ އެ ރަށް ވަކި ބަޔަކަށް ދިނުމަށް ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ އެވެ. ޕްރޮސެކިއުޓަ ޖެނެރަލް (ޕީޖީ) އޮފީހުން ޔާމީންގެ މައްޗަށް އުފުލީ މަނީ ލޯންޑްރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާއެވެ.
މި ދައުވާތައް ޕީޖީގެ ފަރާތްޕުޅުން ދައުލަތުގެ ވަކީލު އިއްވުމުން، ރައީސް ޔާމީން ވިދާޅުވީ، އިއްވި ދައުވާތައް އެމަނިކުފާނަށް ސާފުވެވަޑިއިނުގަންނަވާ ކަމަށެވެ.
ދައުވާތަކުން ސާފުނުވަނީ، ކޮންކަމެއްތޯ އެހުމުން، މި މައްސަލަ ބައްލަވާ، އިސް ގާޒީ އަހުމަދު ޝަކީލް ސުވާލު ކުރެއްވުމުން އެކަމާ ގުޅިގެން ވަކީލުންނާއި މަޝްވަރާ ކުރެއްވުމަށް ބޭނުންފުޅު ވެވަޑައިގަންނަވާކަމަށް ރައީސް ޔާމީން ވިދާޅުވި އެވެ.
އެކަމާއި ގުޅިގެން ގާޒީ ވިދާޅުވީ، އަންނަ މަހުގެ 10 ވަނަ ދުވަހު މި މައްސަލާގެ އިތުރު އަޑު އެހުމެއް އޮންނާނެ ކަމަށާއި، އެދުވަހު ދައުވާއަށް ޖަވާބުދާރީ ވުމުގެ ފުރުސަތު އޮންނާނެ ކަމަށެވެ.
މީގެ އިތުރުން މިއަދުގެ އަޑުއެހުމުގައި ރައީސް ޔާމީންގެ ވަކީލުން ވަނީ، ރައީސް ޔާމީންގެ މައްސަލަ އަވަސް އަރުވައިލައިގެން ކޯޓުން ކުރިއަށް ގެންދާ ކަމަށް ވިދާޅުވެފަ އެވެ.
އެކަމާއި ގުޅިގެން ގާޒީ ވިދާޅުވީ، މައްސަލަތަށް ޝެޑިއުލް ކުރަނީ އެމައްސަލަ ބައްލަވާ ގާޒީއެއް ކަމަށާއި، އެއްވެސް ބޭފުޅަކާ މެދު ތަފާތު ކުރުމެއް ކޯޓުން ނުގެންގުޅޭ ކަމަށެވެ. އަދި ރައީސް ޔާމީންގެ މައްސަލަ ކުރިއަށް ގެންދަނީ އަވަސް އަރުވައިލައިގެން ނޫން ކަމަށްވެސް ގާޒީ ވިދާޅުވިއެވެ.
މި ޝަރީއަތް ލައިވްކޮށްގެން ކުރިއަށް ގެންދަން ރައީސް ޔާމީންގެ ފަރާތުން އެދުމުން، ގާޒީ ވިދާޅުވީ، އެ ކޯޓުގައި މިހާރު ލައިވް ކޮށްގެން މައްސަލަ ކުރިއަށް ގެންދިއުމުގެ ވަސީލަތް ނެތް ކަމަށާއި، އެހެން ނަމަވެސް މައްސަލަ އަކީ ހުޅުވާލެވިގެން ކުރިއަށްގެންދާ މައްސަލައެއް ކަމުން ބޭނުންވާ ފަރާތްތަކަށް ކޯޓުން ކަނޑައެޅިފައިވާ ޖާގައަށް މައްސަލައިގެ އަޑު އެހުންތަކަށް ވަދެވޭނެ ކަމަށެވެ.
މި މައްސަލަ އާ ގުޅިގެން ދެން ދައުވާ ކުރާ،ރައްޔިތުންގެ މަޖިލީހުގެ ކުރީގެ މެމްބަރު ޔޫސުފް ނައީމް މިއަދު ކޯޓަށް ހާޒިރުވެފައި ނުވެއެވެ. އެކަމާއި ގުޅިގެން ގާޒީ ވިދާޅުވީ، ނައީމްގެ ސިއްހީ ހާލަތުގެ ސަބަބުން ކޯޓަށް ހާޒިރު ނުވެވޭނެ ކަމަށް އޭނާ އަންގާފައި ވާކަމަށާއި، އަންނަ މަހުގެ ދެވަނަ ދުވަހު ނައީމުގެ ބައި ކުރިއަށް ގެންދާނެ ކަމަށެވެ.
މި މައްސަލަ ބައްލަވާ ގާޒީ މިއަދު ވަނީ ރައީސް ޔާމީންގެ މައްސަލައިގައި ކުރިއަށް ގެންދާނެ ގޮތުގެ ތާވަލް ހާމަ ކުރައްވައިފައެވެ. އެ މައްސަލަ ނިންމުމަށް ކަނޑައަޅާފައި ވަނީ މި އަހަރުގެ ނޮވެމްބަރު މަހުގަ އެވެ.
