ޓޭމް އިން ނެރުނު ނޫސް ބަޔާނެއްގައި ބުނެފައިވަނީ އިއްޔެގެ ރިޔާސީ ބަޔާނުން ދާއިރާ އާ މެދު ލިބުނު އުންމީދަކީ ގައުމު ބިނާކުރުމަށް އެޅުނު ހަރުދަނާ ފިޔަވަޅެއް ގޮތުގައި ދެކޭކަމަށެވެ. އަދި މި ބަދަލަކީ އެ އެސޯސިއޭޝަނުން ދާއިރާއަށް އައުމަށް އެދިއެދި ހުރި ބަދަލަކަށް ވުމާއެކު އެކަން އުފަލާއެކު ބަލައިގަންނަކަމަށް ބުނެފައިވެއެވެ.
ޓޭމް އިން އިތުރަށް ބުނެފައިވަނީ މި ބަދަލު އައިސްފައި މިވަނީ ތައުލީމީ ދާއިރާގައި ތިބި ފެންވަރު ރަނގަޅު ޓީޗަރުން އެހެން ދާއިރާތަކަށް ދިއުމާއި ކިޔަވައިގެން ތިބި މޮޅެތި ކުދިން ތައުލީމީ ދާއިރާއަށް ޝައުގުވެރިކަން ކުޑަވެފައިވާ ވަގުތެއްގައި ކަމަށެވެ. އެހެން ކަމުން މިބަދަލަށް އެ އެސޯސިއޭޝަނުންވަނީ މަރުހަބާ ކިޔައިފައެވެ.
ރައްޔިތުންގެ މަޖިލީހަށް ރިޔާސީ ބަޔާން ހުށަހެޅުއްވަމުން ރައީސް ވިދާޅުވީ ތައުލީމީ ދާއިރާގެ ހުރިހާ މުވައްޒަފުންގެ މުސާރަ މޭ މަހު ބޮޑު ކުރަން ނިންމާފައިވާ ކަމަށެވެ. އެގޮތުން ޑީގްރީ ފެންވަރުގެ ޓީޗަރުންގެ މުސާރަ އަންނަ މޭ މަހުން ފެށިގެން 19،700 ރުފިޔާއަށް ބޮޑު ކުރާނެކަމަށް ރައީސް ސާލިހު ވަނީ އިއްޔެ ވިދާޅުވެފަ އެވެ.
