ކްރިމިނަލް ކޯޓުގެ މީޑިއާ އޮފިސަރު އަމާން މުހައްމަދު ނަޖީބް "ސީއެންއެމް" އަށް ވިދާޅުވީ، އެމައްސަލައިގެ އިބްތިދާއީ އަޑުއެހުން މިމަހުގެ 10ވަނަ ދުވަހުގެ 13:30 އަށް މިހާރު ތާވަލް ކޮށްފައިވާ ކަމަށެވެ.
މަހްލޫފުގެ ޝަރީއަތް ކުރިއަށް ގެންދިއުން ލަސްވަނީ ކޮވިޑްގެ ސަބަބުން ކަމަށް ބުނެ، މަހްލޫފުގެ ޝަރީއަތް ކުރިއަށް ގެންދަން ކޯޓުން ނިންމާފައި އޮތީ ކޮވިޑްގެ ހާލަތު ރަނގަޅުވުމުންނެވެ.
އެވިސްނުން ބަދަލުވީ ކީއްވެތޯ ސުވާލުކުރުމުން އަމާން ވިދާޅުވީ، މަހްލޫފް މައްސަލަ އަކީ ގިނަ ބަޔަކު އަޑު އެހުމަށް ވަނުމަށް ނަން ނޯޓުކުރާ މައްސަލައެއް ކަމަށެވެ. މަހްލޫފުގެ އަޑުއެހުން ފެށުމަށް ނިންމީ އެފަދަ ގިނަ މީހުންން ކޯޓު ރޫމަށް ގެނެސް ގެންގޮސް ކޯޓު ރޫމް މެނޭޖް ކުރަން ބޭނުންވާ ސެކްޝަންގެ ކޯޓު އޮފިސަރު ކޮވިޑް އަށް ޕޮޒިޓިވް ވުމަށް ފަހު މިހާރު ރަނގަޅުވެފައިވާތީ ކަމަށެވެ. އަދި ކޯޓުގެ ގިނަ މުވައްޒަފުން ބޫސްޓަ ޑޯޒް ވެސް މިހާރު ޖައްސަވާފައިވާތީ، ގިނަ ބަޔަކު ހާޒިރުކޮށްގެން ހިނގާ ޝަރީއަތެއް ބޭއްވޭ ވަރަށް މައްސަލަ ބަލާ ސެކްޝަންގެ ކޮވިޑްގެ ހާލަތު މިހާރު ރަނގަޅުވެފައިވާ ކަމަށް އޭނާ ވިދާޅުވިއެވެ.
މިނިސްޓަރު މަހްލޫފަށް ދައުވާކޮށްދިނުމަށް އެދި އޭސީސީން ޕީޖީ އޮފީހަށް މިދިޔަ އަހަރުގެ ޖޫން ނުވަ ވަނަ ދުވަހު ފޮނުވީ އެސްއޯއެފް އިން މިނިސްޓަރު މަހްލޫފް އަށް ފައިސާދީފައިވާކަމަށް ތުހުމަތުކުރެވުނު މައްސަލާގައެވެ.
އެތައް ފަހަރަކު މައްސަލަ އޭސީސީއަށް އަނބުރާ ފޮނުވާލުމަށް ފަހު ފަސް މަސް ފަހުން އެމްއެމްޕީއާރްސީގެ ހިޔާނާތުގެ މައްސަލާގައި ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ ދަށުން ރިޝްވަތު ހިފުމުގެ ދައުވާ މިނިސްޓަރު މަހްލޫފުގެ މައްޗަށް އުފުލާ ދައުވާކުރަން ޕީޖީ އޮފީހުން ކްރިމިނަލް ކޯޓަށް ފޮނުވާފައިވަނީ މިދިޔަ އަހަރުގެ ނޮވެމްބަރު މަހުގެ 24 ވަނަ ދުވަހުއެވެ.
ނަމަވެސް އެކަމަށްޓަަކައި އޭގެ ދެ މަސް ފަހުން ފުރަތަމަ ފަހަރަށް އެމައްސަލައިގެ އަޑު އެހުމެއް ބާއްވަން މިދިޔަ ޖެނުއަރީ މަހުގެ ތެރޭގައި ތާވަލު ކުރުމަށް ފަހު، އެ ދުވަހު ވަނީ އެ ޝަރީއަތް ކެންސަލް ކޮށްފަ އެވެ. އިދާރީ މައްސަލައެއްގެ ސަބަބުން ކަމަށް ބުނި ނަމަވެސް ސީދާ ސަބަބެއް އެ ދުވަހު ސާފެއް ކޮށެއް ނުދެއެވެ.
މަހްލޫފުގެ ޝަރީއަތް ކުރިއަށް ގެންދިއުން ލަސްވަމުންދާތީ ކަންބޮޑުވުން ފާޅުކުރަން ފެށުމުން ކްރިމިނަލް ކޯޓުން އެފަހަރު ބުނީ ކޯޓުން ބޭނުންވާ ނަމަ، މި ހާލަތުގައި އަޑުއެހުންތައް ލަސްކުރެވިދާނެ ކަމަށާއި، ކޯޓުން މަހްލޫފުގެ މައްސަލަ ކުރިއަށް ގެންދަން ނިންމާފައިވަނީ ކޮވިޑްގެ ހާލަތު ރަނގަޅުވުމުން އެ މައްސަލައިގައި ހިމެނޭ ހުރިހާ އެންމެން ކޯޓަށް ހާޒިރު ކޮށްގެން ކަމަށެވެ.
ކޯޓުގެ ކޮވިޑް ހާލަތު ރަނގަޅުވެގެން މަހްލޫފުގެ މައްސަލަ ތަވާލުކުރި އިރު، ގިނަ ބަޔަކު ތުހުމަތު ކުރާ ގޮތުގައި މަހްލޫފުގެ ޝަރީއަތް ކްރިމިނަލް ކޯޓުގައި ނުފަށާ އޮންނަނީ މިމަހުގެ ފަސްވަނަ ދުވަހު އޮންނަ ކޮމަންޑޫ ދާއިރާގެ ކެމްޕެއިނަށް ކެމްޕެއިން ކުރުމުގެ ފުރުސަތު ދިނުމުގެ ގޮތުންނެވެ.
ޝަރީއަތް ކެންސަލްކޮށް އިތުރު ޝަރީއަތެއް ބޭއްވުން ކޮވިޑާއި ގުޅިގެން ކޯޓުން ލަސްކޮށްފައިވާއިރު، މަހްލޫފް ދިޔައީ ފެބްރުއަރީ މަހު ފަސް ވަނަ ދުވަހު އޮންނަ ކޮމަންޑޫ ދާއިރާގައި ހިމެނޭ ބައެއް ރަށްރަށަށް ޒިޔާރަތް ކުރައްވަމުންނެވެ. ބައެއް ރަށްރަށުގައި މަޝްރޫއުތައް ފައްޓަވައި ދެއްވުމަށް ވެސް ގިނަ ދަތުރުތަކެއް މިނިސްޓަރު ދަނީ ކުރައްވަމުންނެވެ.
އެދާއިރާގެ އިންތިހާބު އޮންނާނީ މާދަމާއެވެ.
