އިސްކަންދަރު ސްކޫލުގެ ކުރިމަތީ ހުރި އެމްޑީޕީ ޖަގަހަ ތެރެއަށް އެ ސަރަހައްދުގައި ބަހައްޓާފައިވާ ވޯޓު ފޮއްޓަށް ވޯޓުލާން ދާ މީހުން ވައްދާ އެމީހުންނަށް ފައިސާ ބަހާކަމަށް ބުނެ ޕީޕީއެމް ސަޕޯޓަރުން ދަނީ އެކަމާ ހިތްހަމަ ނުޖެހުން ފާޅުކުރަމުންނެވެ.
މީގެ އިރުކޮޅެއް ކުރިން އެ ސަރަހައްދުގައި އަނެއްކާ ވެސް ވަނީ ހަމަނުޖެހުންތައް ބޮޑުވެފައެވެ. އެ ސަރަހައްދުގައި ހަރަކާތްތެރިވާ “ސީއެންއެމް”ގެ ނޫސްވެރިޔާ މައުލޫމާތު ދޭ ގޮތުގައި އެ ހަމަނުޖެހުންތައް މިފަހަރު މި ހިނގީ، އެމްޑީޕީ ޖަގަހަ ދޮރުމަތީ ތިބި ފުލުހުންގެ އެހީތެރިކަމާ އެކު އެ ޖަގަހަ ތެރެއަށް އެއްޗެއް ވައްދަން މަސައްކަތް ކުރުމުންނެވެ.
އެއީ ފައިސާ ފޮއްޓެއް ކަމަށް ބުނެ އެ ސަރަހައްދުގައި ތިބި ޕީޕީއެމް ސަޕޯޓަރުން ވަނީ ޖަގަހަ އެތެރެއަށް އެ ފޮށި ވެއްދުމަށް ހުރަސް އަޅާފަ އެވެ. ނަމަވެސް ފުލުހުންގެ އެހީތެރިކަމާ އެކު އެ އެއްޗެއް ވަނީ ޖަގަހަ އަށް ވައްދާފައެވެ.
އެމްޑީޕީ އާއި ޕީޕީއެމްގެ ސަޕޯޓަރުންނާއި ދެމެދެ ހަމަނުޖެހުން އުފެދިފައިވާތީ އެ ސަރަހައްދުގައި ގިނަ އަދަދެއްގެ ފުލުހުން ދަނީ ހަރަކާތްތެރިވަމުންނެވެ.
