ވ.ފެލިދޫގައި 'އިބަމަ' އިފްތިތާޙް ކުރުމާއި އިނިޝިއޭޓިވް ޓްރެއިނިން ޕްރޮގްރާމް ފެއްޓުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، މިނިސްްޓްރީއާއި ހަމައަށް ކަމެއް ހިނގިކަމުގެ މައުލޫމާތު ލިބެނީ އެކަމެއް ހިނގާ ފަހުން ކަމަށާއި އެހާ ހިސާބުން ދެން ޖެހެނީ ރައްކާތެރިކަން ފޯރުކޮށްދޭން ކަމަށެވެ. ނަމަވެސް އެކަމަނާ ބޭނުންވަނީ އެކަން ބަދަލުކުރަން ކަމަށް ވިދާޅުވިއެވެ.
މިނިސްޓަރު ވިދާޅުވީ އެކަން އެގޮތައް ކުރެވޭނީ ރައްޔިތުންނާއި ގާތުން، އެންމެހާ މުއައްސަސާތައް ގުޅިގެން އެ މަސައްކަތް ކަތްކޮށްގެންކަމަށާއި އެހެންކަމުން، އިބަމަގެ ބައިވެރިން ވެގެންދާނީ މިފަދަ އިޖްތިމާޢީ ހާލަތުތައް މެޕް ކުރަން ތަމްރީންކުރެވޭ ފަރާތްތަކަކަށް ކަމަށެވެ.
އޭގެ އިތުރުން މިނިސްޓަރު ވިދާޅުވީ ހަވާސާއިން ބޭރުގައި ތިބޭ ފަރާތްތަކަށް ބޭނުންވާ ހިދުމަތްތައް ލާމަރުކަޒީ އުސޫލުން ހަމަޖެހުމުން ނޫނީ އެދެވޭ ހިދުމަތެއް ފޯރުކޮށެއް ނުދެވޭނެކަމަށެވެ.
"އިބަމަ" ނުވަތަ "އިޖްތިމާއީ ބަދަހި މަދަދުވެރިން" އަކީ އެރަށެއްގެ ރައްޔިތުން ކަމަށްވާއިރު، އެރަށެއްގެ އިޖުތިމާއީ މައްސަލަތައް ދެނެގަތުމާއި، އެކަންކަމަށް ބޭނުންވާ ހައްލު އެންމެ ރަނގަޅަށް އެނގޭނީ އެރަށެއްގައި ދިރިއުޅެމުންދާ ރައްޔިތުންނަށް ކަމަށް ވާތީ ކަމަށާއި އެފަރާތްތަކަށް ވާސިލްވެ، އެ ފަރާތްތަކުގެ ހާލަތު އެންމެ ގާތުން ބެލޭނީ ހަމަ އެބޭފުޅުންނަށް ކަމަށް މިނިސްޓަރު ވިދާޅުވިއެވެ.
މިހާތަނަށް ރާއްޖޭގެ ތިން ރަށެއްގައި 73 ފަރާތެއް ވަނީ އިބަމަ ޓްރެއިނިން ފުރިހަމަކޮށްފައެވެ.
