މި މައްސަލަ އެކޮމިޓީއަށް ހުށަހަޅާފައިވަނީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދު އެވެ.
ރައީސް ނަޝީދު އެކޮމިޓީއަށް ފޮނުވި ސިޓީގައި ބުނެފައިވަނީ، އެފަދަ އަމަލުތަކަކީ ތަހުޒީބު އެއްވެސް މުޖުތަމައެއްގައި ބަލައިގަންނަ އަމަލުތަކަށް ނުވާއިރު، އޭގެ ސަބަބުން ރާއްޖޭގެ މަސްލަހަތާއި ހިލާފު އަދި އެކަމުގެ ސަބަބުން ރާއްޖޭގެ ސަރުކާރާއި އިންޑިއާގެ ސަރުކާރާއި ދެމެދު ޒަމާނުއްސުރެ އޮތް ގާތް ގުޅުމަށް ހީނަރުކަން އައުމުގެ ފުރުސަތު އޮންނާނެ ކަމަށެވެ.
ރައީސް ނަޝީދު މަޖިލީހުގެ ކޮމިޓީއަށް ހުށަހެޅުއްވި މައްސަލަ ކޮމިޓީން ބޭރުކޮށްލުމަށް ތ.ގުރައިދޫ ދާއިރާގެ މެންބަރު މުހައްމަދު ގައްސާން މައުމޫން ވަނީ ހުށަހަޅުއްވާފައެވެ. ނަމަވެސް ކޮމިޓީން އެ ހުށައެޅުމެއް ފާހެއް ނުވިއެވެ.
ރައީސް ނަޝީދު ހުށަހެޅުއްވި މައްސަލަ ކޮމިޓީން ބެއްލެވުމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފް މިއަދު ކޮމިޓީއަށް ހުށަހެޅުއްވުމުން، އެމްޑީޕީގެ މެޖޯރިޓީ އޮންނަ ކޮމިޓީން ވަނީ އެގޮތަށް އެކަން ފާސްކޮށްފައެވެ.
މީގެ އިތުރުން ދިރާސާ ކުރުމަށް އެމްއެންޑީއެފް، ހޯމް މިނިސްޓްރީ، ފޮރިން މިނިސްޓްރީ، ޑިފެންސް މިނިސްޓްރީ، ފުލުހުން، އިކޮނޮމިކް މިނިސްޓްރީއާއި ބައްދަލު ކުރަން ވެސް ކޮމިޓީން ނިންމިއެވެ.
