ރެސްކިއު ބޯޓްތަކުން ޔޫރޯފެރީ އޮލިމްޕިއާގައި ތިބި 290 މީހުން ހުސްކުރުމަށް އަވަސްވެގަނެފައިވެއެވެ.
ފެރީ ގްރީސްގެ އިގުއާމެނީތާ ދޫކޮށް އިޓަލީގެ ބްރިންޑިސީ ބަނދަރަށް ދިޔައީ ކާރު ޑެކެއްގައި އަލިފާން ރޯވެ އަނދަމުން ދަނިކޮށް ކަމަށްވެއެވެ. ފެރީ ގަދައަށް އަނދައި، ދުމުގެ އަސަރު ކުރަން ފެށުމާއެކު، ކެޕްޓަން ވަނީ އެންމެން ވެސް ނުކުންނަން އަންގައިފައެވެ.
ގްރީސްގެ ކޯސްޓްގާޑުން ބުނީ އިޓަލީގެ ކުންފުންޏެއް ކަމަށްވާ ގްރިމަލްޑީ ލައިންސް އިން މިލްކުކޮށްފައިވާ މި ފެރީގައި 239 ފަސިންޖަރުންނާއި 51 ފަޅުވެރިން ތިބި ކަމަށެވެ. މީގެ ތެރެއިން ގިނަ ފަސިންޖަރުންނަކީ އިޓަލީގެ ރައްޔިތުން ކަމަށް އިއޯނިއަން އައިލެންޑްސްގެ ގަވަރުނަރު ރޮޑީ ކްރަޓްސާ-ތަސަގަރޮޕޯލޯ ވިދާޅުވެފައިވާ އިރު، ފަޅުވެރިންގެ ތެރޭގައި ގްރީކް އަދި އިޓަލީގެ މީހުން ތިއްބެވެ.
އިޓަލީގެ އޮފިޝަލުން ވިދާޅުވީ ބޯޓުގައި ތިބި މީހުންގެ ތެރެއިން 277 މީހުން ސަލާމަތްކޮށްފައިވާ އިރު އޭގެ ތެރެއިން 10 މީހަކަށް ނޭވާލުމުގެ މައްސަލަތަކާއި ކުދިކުދި އަނިޔާތައް ލިބުމުން ހޮސްޕިޓަލުގައި ފަރުވާ ދެމުންދާ ކަމަށެވެ. އޭގެ ގަޑިއިރުތަކެއް ފަހުން، މީހުން ސަލާމަތްކުރާ ފަރާތްތަކުން ވަނީ، ފެރީގެ ފަލްކާގައި ހައްޔަރުވެފައި ތިބި ދެ ފިރިހެނުން ވައިގެ މަގުން ސަލާމަތްކޮށްފައެވެ.
ގެއްލުނު 11 މީހުންނާ ބެހޭ ގޮތުން އެއްވެސް މައުލޫމާތެއް ލިބިފައި ނުވާއިރު، ފެރީ ދޫކޮށްފައި ދިޔުމުގެ އަމުރު ދިނުމުން ފެރީން ފޭބުނީ ކިތައް މީހުންކަން ކަށަވަރު ކުރުމުގެ މަސައްކަތް އޮފިޝަލުން ކޮށްފައިވެއެވެ.
ގްރީސްގެ ހުޅަނގު އައްސޭރީގައި އޮންނަ އިގުއާމެނީތާ ބަނދަރުން ފެރީ ފުރައިގެން ދިޔައީ ބުރާސްފަތި ދުވަހުގެ ރޭ 01:50 (ޖީއެމްޓީ ގަޑިން 23:50) ހާއިރުއެވެ. ރޯވެފައިވާ ކަމަށް ހީވެފައިވަނީ ފަލްކާގައި އޮތް ކާރެއްގެ ޑެކެއްގެ ތެރޭގައެވެ. 04:20 ހާއިރު ފެރީ ދޫކޮށް ދިޔުމުގެ އަމުރު ކެޕްޓަން ދިނުމުގެ ކުރިން ފަޅުވެރިން ފުރަތަމަ މަސައްކަތް ކުރީ އަލިފާން ނިއްވާލާށެވެ.
"އަހަރެމެން ފެރީ ދޫކޮށް ދިޔަތާ ގަޑިއެއްހާ އިރު ތެރޭގައި އަހަރުމެން ސަލާމަތް ކުރީ ފަޅުވެރިން" ގްރީކް ޓީވީއަށް މައުލޫމާތު ދެމުން ފަސިންޖަރަކު ބުންޏެވެ.
ފަސިންޖަރުންނާއި ފަޅުވެރިން ވެސް އެ ސަރަހައްދުގެ ބޯޓުތަކުން އެމީހުން ސަލާމަތް ކުރުމުގެ ކުރިން އެރިކޫސާގެ ރަށްތައް ކައިރިން ލައިފްބޯޓްތަކަށް އަރާފައިވެއެވެ. އެންމެ ފުރަތަމަ އެ ސަރަހައްދުގައި ހަރަކާތްތެރިވާތަން ފެނިފައިވަނީ އިޓަލީގެ ކަސްޓަމްސް އުޅަނދެކެވެ.
ކަސްޓަމްސް ފުލުހުން ބުނެފައިވާ ގޮތުގައި އެމީހުންގެ ޕެޓްރޯލް އުޅަނދު މޮންޓެ ސްޕެރޯން އިން ވަނީ ބޯޓުގައި ތިބި މީހުންގެ ތެރެއިން 243 މީހުން ސަލާމަތްކޮށްފައެވެ.
ހުކުރު ދުވަހުގެ ހަވީރު ވެސް އަލިފާން ގަނޑު ކޮންޓްރޯލުނުވެ، އަނދަމުން ދިޔަ ނަމަވެސް، ގްރީސްގެ ސްޕެޝަލައިޒްޑް ރެސްކިއު ޓީމަކުން ވަނީ އަލިފާން ރޯވިތާ 12 ގަޑިއިރަށް ވުރެ ގިނަ އިރު ފަހުން އެ ބޯޓަށް އަރާފައެވެ.
ގްރީކްގެ މީޑިއާތަކަށް މައުލޫމާތު ދެމުން ފަސިންޖަރަކު ބުނީ އެލާމް އަޅަން ފެށިއިރުވެސް ބައެއް މީހުން އެމީހުންގެ ވެހިކަލްތަކުގައި ނިދާފައި ތިބި ކަމަށެވެ.
