އެކުއްޖާ ގޭ ބަންދަށް ބަދަލުކުރީ ކުޑަކުދިން ބައިތިއްބަން އެކަށީގެންވާ ޖަލެއް މިވަގުތު ނެތް ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ދާދި ފަހުން ނެރުނު ރިޕޯޓެއްގައި ބުނެފައިވާތީ އެކަމަށް ރިއާޔަތްކޮށް މިދިޔަ ނޮވެމްބަރު މަސްތެރޭގައެވެ.
އެކަށީގެންވާ ޖަލެއް ނެތިގެން މަރުގެ ދައުވާ ލިބޭ އެ ކުއްޖާ ގެންބަންދަށް ބަދުލުކުރިނަމަވެސް، މިހާރު ވަނީ ކުޑަކުދިންގެ އަދުލުގެ ގާނޫނުގެ ދަށުން އުފައްދަން ޖެހޭ ޖުވެނައިލް ޑިޓެންޝަން ސެންޓަރު ގާއިމްކޮށްފައެވެ.
އެތަނަށް އެކުއްޖާ ބަދަލުކުރުމަށް ދައުލަތުން ފުރަތަމަ އެދުނީ ޖުވެނައިލް ކޯޓުގައެވެ. އެކޯޓުން ނިންމާފައި ވަނީ އެ ކުއްޖާ ގެއަށް ބަދަލުކުރަން ނިންމި ނިންމުމަށް ބަދަލެއް ގެންނަން ޖެހޭ ސަބަބެއް ނެތް ކަމަށެވެ.
އެއަށްފަހު އެ ނިންމުން ދައުލަތުގެ ފަރާތުން ހައި ކޯޓުގައި އިސްތިއުނާފު ކުރިއެވެ.
ދައުލަތުގެ ފަރާތުން ކޯޓުގައި ފާހަގަކޮށްފައިވާ ކަންކަން
- ކުއްޖާ ބަންދުކުރީ، މުޖުތަމައުގެ ސަލާމަތަށްޓަކާ އަދި ހެއްކަށް ނުފޫޒު ފޯރުވުމުގެ އިހްތިމާލު އޮތުމުންކަން
- ދައުލަތުން ހުށަހެޅި ގިނަ ހެކިންނަކީ ކުއްޖާ ދަންނަ ރައްޓެހިން ކަމަށް ވާއިރު، ގޭގައި ބަންދުކުރުމުން އެ ހެކިންނަށް ނުފޫޒު ފޯރުވުމުގެ އިހްތިމާލު އޮތުން
- ތުހުމަތުކުރެވޭ މައްސަލައަކީ ޖިނާއީ ބޮޑު ކުށެއްކަން
ކުއްޖާގެ ފަރާތުން ބުނެފައިވަނީ، ގޭގައި ހޭދަކުރި މުއްދަތުގެ ތެރޭގައި އެއްވެސް ހެއްކަކަށް ނުފޫޒު ފޯރުވަން މަސައްކަތް ނުކުރާކަމަށާއި، މުޖުތަމައުގެ ސަލާމަތަށް ނުރައްކާވާ ކަމެއް ވެސް އެ މުއްދަތުގައި ކުއްޖާ ނުކުރާކަމަށެވެ.
އޭގެ އިތުރުން ތައުލީމު އުގެނުމުގެ ހައްގު ކޮންމެ ކުއްޖަކަށްވެސް ގާނޫނުން ކަށަވަރުކޮށްދޭއިރު، އެ ކުއްޖާއަކީ މިހާރު ކޯހެއްގައި ބައިވެރިވެގެން އުޅޭ ކުއްޖެއްކަން ކުއްޖާގެ ފަރާތުން ފާހަގަކުރިއެވެ.
މިވާހަކަތަކަަށްފަހު ދައުލަތުން ބުނެފައިވަނީ، ކުއްޖާ ބަންދުގައި ހުރި މުއްދަތުގައި ގާނޫނުތަކާއި ހިލާފުވެފައި ނުވުމަކީ، ހާލަަތު ބަދަލުވާ ސަބަބެއް ނޫން ކަމަށެވެ.
ނަމަވެސް ހައިކޯޓުން ވެސް ނިންމާފައިވަނީ ކުއްޖާ ގޭބަންދަށް ބަދަލުކުރި ނިންމުން ބަދަލުކުރަން ނުފެންނަ ކަމަށެވެ.
ރަހީނުކޮށްގެން ގެންގުޅުނު 13 އަހަރުގެ ކުޑަކުއްޖާ ރަހުމުކުޑަގޮތަކަށް މަރާލުމަށް ފަހު ފޮއްޓަކަށްލާ، ހެކި ނެއްތާލުމަށް މަސައްކަތްކުރިކަމުގެ ތުހުމަތުގައި ހައްޔަރުކުރި 17 އަހަރުގެ ކުޑަކުއްޖާގެ މައްޗަށް މީހަކު މެރުމުގެ ދައުވާގެ އިތުރުން، ހުއްދަ ނޫން ގޮތުގައި މީހަކު ހިފެހެއްޓުމާއި މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ ކޮށްފައިވެއެވެ. އެ ކުއްޖާގެ މައްޗަށް ކުރި ދައުވާތައް ސާބިތުވެއްޖެ ނަމަ 11 އަހަރުގެ ޖަލު ހުކުމެއް އަންނާނެ އެވެ.
13 އަހަރު ކުއްޖާ މަރާލުމުގައި ބައިވެރިވި 17 އަހަރުގެ ކުއްޖާގެ މައްޗަށް މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާކޮށްފައިވާއިރު، ކުއްޖާ މަރާލާފައި އެއްލާލާފައި އޮތީ ޖިންސީ ގޮތުންނާއި، ޖިސްމާނީ ގޮތުންވެސް އެތަށް އަނިޔާތަކެއް ދީފަކަމަށް މައުލޫމާތު ލިބެއެވެ. ކުއްޖާ ރަހީނުކޮށްގެން އެދެމީހުން ހަތަރު ވަރަކަށް ދުވަހު ގެންގުޅެފައިވާއިރު، ކުއްޖާ ރަހުމުކުޑަގޮތަކަށް މަރާލާފައި އެއްލާލާފައިވަނީ މިދިޔަ އަހަރުގެ ޖޫން މަހުގެ 23ވަނަ ދުވަހުއެވެ. ކުއްޖާ ގެއްލުނީ 18 ވަނަ ދުވަހުއެވެ.
