ބޮލުން އިސްތަށި ފޭބުމަކީ ކޮންމެ އިންސާނަކަށް ވެސް ދިމާވާ އާދައިގެ ކަމެކެވެ. ނަމަވެސް މާގިނައިން ފައިބާ ނަމަ އެކަމަށް އަވަސް ފަރުވާ އެއް ހޯދަން ޖެހެއެވެ. ސަބަބަކީ ތަލަ ވުމުގެ ފުރުސަތު އޮތުމެވެ.
ބޮލުން އިސްތަށި ފޭބުން މަދު ކުރުމަށްޓަކައި ކަސްރަތުކޮށް ހަށިގަނޑަށް ބޭނުންވާ ވިޓަމިންސް، މިނެރަލްސް، ޕްރޮޓީންސް އަދި ފެޓްސްގެ މާއްދާތައް އެކުލެވޭ ކާނާ ޤަވާއިދުން ކެއުމަކީ ރަނގަޅު ކަމެކެވެ. މީގެ އިތުރުން ފިކުރުކުރުން (ސްޓްރެސްވުން) ހުއްޓުވުމަކީ އެންމެ މުހިއްމު އެއްކަމެވެ.
އިސްތަށިގަނޑު ފަންކޮށް، ކުލަ ޖައްސާ ބްލީޗު ކުރުމަކީވެސް އިސްތަށި ފައިބަން މެދުވެރިވާ ސަބަބެކެވެ. މި ކަން ކަމުގެ ސަބަބުން އިސްތަށިގަނޑު ދިގުވުމަށް ހުރަސް ނޭޅުނު ނަމަވެސް، އިސްތަށިތަކުގެ ދުޅަހެޔޮކަން ގެއްލެ އެވެ. އެގޮތުން އެ އަމަލުތަކުގެ ސަބަބުން އިސްތަށިގަނޑުގެ ޕްރޮޓީން ސްޓްރަކްޗާ ހަލާކުކޮށްލަ އެވެ. އަދި އިސްތަށި ފޭބުމަށް މެދުވެރިވެ އެވެ.
މިކަން ކަމުގެ އިތުރުން ދުންފަތުގެ އިސްތިޢުމާލު ކުރުމަކީ ބޮލުން އިސްތަށިފައިބަން މެދުވެރިވާ ސަބަބެކެވެ. ދުންފަތަކީ އޭގައި ވަރަށް ގިނަ ވިހަމާއްދާތައް އެކުލެވޭ ވަރުގަދަ ކެމިކަލްއެކެވެ. އެގޮތުން ދުންފަތް ބޭނުންކުރުން ހުއްޓާލަންވީ ހަމައެކަނި ބޮލުން ފަތްފާބާތީކީ ނޫނެވެ. އޭގެ އިތުރުން ލޭގެ ކެންސަރާއި، ނޭވާލާ ނިޒާމަށް ޖެހޭ ބޮޑެތި ބަލިތަކުން ނާއި، ހިތުގެ ބަލިތައް ފަދަ ބޮޑެތި ބަލިތައް ޖެހުމަށް މެދުވެރިކޮށްދޭ އެއްޗަކަށްވެސް ދުންފަތް ވާތީއެވެ.
