ރާއްޖޭގައި އަންހެނުންގެ ދުވަސް ފާހަގަ ކުރުމުގެ ގޮތުން ސަރުކާރުގެ އިދާރާ ތަކާއި، ސަރުކާރު ހިއްސާވާ ކުންފުނި ތަކުގެ އިތުރުން ޕްރައިވެޓް ކުންފުނިތަކުން ވެސް އަންނަނީ އެ ދުވަހު އެތަންތަނުގައި މަސައްކަތް ކުރާ އަންހެން މުވައްޒަފުންނަށް ހަދިޔާ އާއި އެ މުވައްޒަފުންނަށް އުފާވެރި ވަގުތު ކޮޅެއް ގެނެސްދިނުމަށް ތަފާތު ކަންކަން ކުރަމުންނެވެ.
މާދަމާ އަންހެނުންގެ ދުވަސް ފާހަގަ ކުރާއިރު ދުވަހާ ގުޅިގެން ހަދިޔާ ނުދެވޭގޮތަށް އެކުލަވާލާފައިވާ ސާކިއުލާގައި ބުނެފައިވަނީ މި އަހަރުގެ އަންހެނުންގެ ދުވަސް ފާހަގަ ކުރާއިރު، އަންހެން މުވައްޒަފުންނަށް މަރުހަބާ ކިޔުމުގައި ރަތްދޫލަ ނޭޅުމަށާއި މާބޮނޑި ފަދަ ތަކެތި ނުދިނުމަށް އިލްތިމާސް ކޮށްފައެވެ.
އެ މިނިސްޓްރީގެ ސާކިއުލާގައި އިތުރަށް ބުނެފައިވަނީ، ފިޔާތޮށި ކުލަ ފަދަ ވަކި ޖިންސަކަށް ނިސްބަތް ކުރެވޭ ކަމަށް މުޖުތަމައުއަށް ގަބޫލުކުރެވޭ ފަދަ ކުލަ ބޭނުން ނުކުރުން އެދޭ ކަމަށާއި، ހަދިޔާގެ ގޮތުގައި ޗޮކްލެޓާއި ކޭކު ނުދިނުމުގެ އިތުރުން ބަދިގޭގައި ގެންގުޅޭ ތަށި ތެއްޔާއި އުނދުޅި އަދި ގޭތެރެ ސާފުކުރާ މޮޕާއި ފިހިގަނޑު ފަދަ ތަކެތި ހަދިޔާގެ ގޮތުގައި ނުދިނުމަށް އިލްތިމާސް ކޮށްފައެވެ.
އެ މިނިސްޓްރީން ނެރުނު ސާކިއުލާގައި އިތުރަށް ބުނެފައިވަނީ، އަންހެނުންގެ ދުވަސް ފާހަގަކުރަން ވާނީ "ޖެންޑާ އީކުއެލިޓީ ޓުޑޭ ފޯ އަ ސަސްޓެއިނަބަލް ޓުމޯރޯ" ޝިއާރުގެ މަގްސަދު ހާސިލް ކުރެވޭނެ ގޮތައް ކަމަށާއި، އަންހެނުންގެ ދުވަސް ފާހަގަ ކުރުމަށް ކުރިއަށް ގެންދާ ހުރިހާ ހަރަކާތެއްގައި މި ހޭޝްޓެގް ބޭނުން ކުރުމަށެވެ.
މިއީ ރާއްޖޭގެ ތާރީހުގައި އަންހެނުންގެ ދުވަސް ފާހަގަ ކުރުމުގައި ދޭންޖެހޭ ހަދިޔާ އާއި ގެންގުޅެންޖެހޭ އުސޫލު މިނިސްޓްރީއަކުން އާއްމު ކުރި ފުރަތަމަ ފަހަރެވެ. އެހެން ކަމުން މި އަހަރު ފާހަގަ ކުރާ ބައިނަލްއަގްވާމީ އަންހެނުންގެ ދުވަސް ސަރުކާރުގެ އިދާރާތަކުން ފާހަގަ ކުރާއިރު، ގިނަ ކަންކަން ބަދަލުވެގެން ދާނެއެވެ.
