އަންހެނުންގެ ދުވަހުގެ މުނާސަބަތާއި ގުޅިގެން މިނިސްޓަރު ދެއްވި ހިތާބުގައި ވިދާޅުވީ، މިންތީގެ ހަމަހަމަކަން ގާއިމު ކުރުމަށް ގިނަ ހުރަސްތަކެއް އަދިވެސް ރާއްޖެ އާއި މުޅި ދުނިޔޭގައި ވެސް އެބަހުރި ކަމަށާއި، މިކަންކަމަކީ އެއް ދުވަހުން ހައްލު ކުރެވޭނެ ކަންކަން ނޫން ކަމަށެވެ.
އަދި މިންތީގެ ހަމަހަމަކަން ހާސިލް ކުރުމަށް ބޭނުންވާ މަންޒިލަށް ވާސިލް ވުމަށް ކުރަންޖެހޭ ކަންކަން ހަމައެކަނި މިނިސްޓްރީން ކުރާ މަސައްކަތުން ހާސިލް ނުކުރެވޭނެ ކަމަށާއި، އެކަމަށް ހުރިހާ ދާއިރާއަކުން ފުރިހަމައަށް އެއްބާރުލުންދީ ގުޅިގެން މަސައްކަތް ކުރަންޖެހޭނެ ކަމަށެވެ.
މިނިސްޓަރުގެ ހިތާބުގައި ވިދާޅުވީ، ޖެންޑާ އީކުއަލިޓީ ގާނޫނުގެ ދަށުން، ކައުންސިލުތަކަށް ޒިންމާތައް ހަވާލު ކުރުމަށް 2021 ވަނަ އަހަރުގެ ޑިސެމްބަރު މަހު ގަވާއިދެއް ގެޒެޓުކުރެވި، މި އަހަރުގެ ޖޫން މަހުން ފެށިގެން އަމަލު ކުރަން ފަށާނެ ކަމަށާއި، މި މަސައްކަތްތައް އެންމެ ފުރިހަމަ ގޮތުގައި ރޭވުމަށްޓަކައި ކޮންމެ އަތޮޅެއްގައި ހުންނަ މިނިސްޓްރީގެ ފެމިލީ އެންޑް ޗިލްޑްރަން ސާވިސް ސެންޓަރު ތަކުގެ ޖެންޑަ އީކުއަލިޓީ އެކްޝަން ޕްލޭންއަށް އަހުލުވެރިކުރުމަށް ތަމްރީން ޕްރޮގްރާމެއް ކުރިއަށް ގެންދެވި މާޗު މަހުގެ ތެރޭގައި، އަތޮޅު ފެންވަރުގައި، ރަށު ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ގުޅިގެން އަމަލީ ސިފައެއްގައި އެކްޝަން ޕްލޭން ތަންފީޒުކުރުމަށްޓަކައި ޕްރޮގްރާމްތަކެއް ކުރިއަށް ގެންދެވޭނެ ކަމަށެވެ.
އަދި މި ޕްލޭން ތަންފީޒުކުރުމަށް ހިނގާނެ ހަރަދު އަންދާޒާކުރުމަށްޓަކައި "އެކްޝަން ޕްލޭންގެ ކޯސްޓް" ކުރުމުގެ މަސައްކަތްތަކެއް ކުރެވޭނެ ކަމަށާއި، މި ކޯސްޓިން ގެ ސަބަބުން 2023 ވަނަ އަހަރުގެ ބަޖެޓް އެކުލަވާލާއިރު އެކްޝަން ޕްލޭން ތަންފީޒުކުރުމަށް ހުރިހާ ދާއިރާއަކުން ވެސް އަންދާސާކޮށް ބަޖެޓް ކުރުމުން ފަސޭހަވެގެންދާނެ ކަމަށް މިނިސްޓަރު ވިދާޅުވި އެވެ.
