ޗެއާޕާސަން އިންތިހާބު ބާއްވާނެ ތާރީހެއް ކަނޑައެޅުމަށް އަންގާރަ ދުވަހުގެ ރޭ އެމްޑީޕީން ބޭއްވި އެ ޕާޓީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުން ވައްޑެ ވިދާޅުވީ އެމްޑީޕީން އެންމެ ގިނައިން މުޒާހަރާކުރީ އިންތިހާބު އަވަސްކުރަން ގޮވާލުމަށްޓަ އެވެ. އެ ގޮތުން އެކި ޝިއާރުތަކާއި ޕޯސްޓަރުތައް ހަދައިގެން ވަރަށް ގިނަ މަސައްކަތް ކުރެވުނުކަމަށް ވައްޑެ ވިދާޅުވި އެވެ.
އިންތިގެ ކެމްޕޭނަށް އިޝާރަތްކުރައްވަމުން ވައްޑެ ވިދާޅުވީ މާލޭ ސިޓީ އާ އެހެނިހެން ރަށްރަށުގައި ކުރެވުނު ކެމްޕޭނުން އެނގިގެން ދިޔައީ އެމްޑީޕީގެ ގިނަ އާންމު މެންބަރުންނަށް އުންމީދެއް ލިބިގެންދާކަން ކަމަށެވެ. ހަމައެހެންމެ ފެނިގެންދަނީ އާންމު މެންބަރުންނަށް ޖޯޝާއި ފޯރިއެއް އަންނަ ތަން ކަމަށެވެ.
ރޭގެ ޖަލްސާގައި ވާހަކަ ދެއްކެވި ވެލިދޫ ދާއިރާގެ މެންބަރު މުހައްމަދު ޢަބްދުﷲ ޝަފީގް ވިދާޅުވި ގޮތުގައި އިންތިހާބުގެ މުއްދަތު ދިގުލައިގެން ދަނީ ނަމަ ވަރަށް ގިނަ ބޭއިންސާފު ކަންކަން ހިނގާނެ ކަމަށާއި, މިހާރު ވެސް އެބަ ހިނގާ ކަމަށެވެ.
ހޫނުވެ އެތައް ފާޑު ކިޔުމެއް ދެ ފަރާތަށް ވެސް އަމާޒުވި ރޭގެ ޖަލްސާގައި ފާސްކުރީ 14 މެއިގައި އިންތިހާބު ބޭއްވުމަށެވެ.
