ރައްޔިތުން މަޖިލީހުގެ މިއަދުގެ ޖަލްސާގައި ސަލީމް ވިދާޅުވީ ގާނޫނު އަސާސީގެ 84 ވަނަ މާއްދާގައި ގައުމުގެ ހާލަތު ބަޔާންކޮށްދީ ގައުމުގެ ހާލަތު އިތުރަށް ރަނގަޅު ކުރަންޖެހޭ ކަންކަމުގެ މައްޗަށް ރިޔާސީ ބަޔާނެއް ކޮންމެ އަހަރެއްގެ ރައްޔިތުން މަޖިލީހުގެ ފުރަތަމަ ޖަލްސާގައި ރައީސުލްޖުމްހޫރިއްޔާ އިއްވަވަންވާނެކަމަށް ކަމަށް ބަޔާންކޮށްފައި އޮންނަ ކަމަށެވެ.
ނަމަވެސް 2022 ވަނަ އަހަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއްވެވި ރިޔާސީ ބަޔާނުގައި ގައުމުގެ ހާލަތު އެކަށީގެންވާ ގޮތެއްގައި ބަޔާންކޮށްދެއްވެވިފައިނުވާކަން ފާހަގަކުރައްވާ ކަމަށެވެ.
ސަލީމް ވިދާޅުވީ ރައީސް ސޯލިހުގެ ރިޔާސީ ބަޔާނުގައި ދެއްކެވި ގިނަ ވާހަކަފުޅުތަކަކީ ނަތީޖާ ނުނެރެވޭނެ ކަހަލަ ވާހަކަފުޅުތަކެއް ކަމަށެވެ. އަދި އެއީ އެއްވެސް ކަހަލަ ރޭވުންތެރިކަމެއް ނެތް ދުރު ރާސްތާގެ އަމާޒެއްނެތި ދެއްކެވި ހުސް ވާހަކަފުޅުތަކެއް ކަމަށާއި, މިއީ ޒިންމާދާރުކަން ކުޑަ އަމަލެއް ވެސް ސަލީމް ވިދާޅުވިއެވެ.
މި އަހަރުގެ ރިޔާސީ ބަޔާނުގައި ރައީސް ސޯލިހު ވަނީ ދިވެހި ޒުވާނުންނާއި ހުނަރުވެރިންގެ މަސައްކަތާއި, ވިޔަފާރިތައ ބައިނަލްއަގްވާމީ މާކެޓަށް ހުޅުވެން އެބަޖެހޭކަމަށް ވިދާޅުވެފައެވެ. އަދި އެކަމަށް އޮތް ހުރަހަކަށް މިހާރު އޮތީ ބައިނަލްއަގްވާމީ ޕޭމަންޓް ގޭޓްވޭ ކަމަށާއި, އިރާދަކުރެއްވިއްޔާ އެ ގޭޓްވޭ ހުޅުވައި ދިވެހި ހުނަރާއި, ފަންނާއި, ވިޔަފާރި ދުނިޔެއަށް ފެތުރިގަތުމަށް ހުރި ހުރަސްތައް ސަރުކާރުން ނައްތާލާނެ ކަމަށެވެ.
އޭގެ އިތުރުން ގައުމެއްގެ ތަސްވީރަކީ އެ ގައުމެއްގެ ފަންނާނުން އުފައްދާ އެއްޗެއް ކަމަށާއި, ތާރީހާއި, ސަގާފަތާއި, އާދަކާދަ އުވުނަނުދީ ކުލަ ގެނުވައިދެނީ އެމީހުންގެ ކުލަފިއްސާއި, ރާގާއި ޅެންބަހުރުވައިންކަން ވެސް ރައީސް ސޯލިހު ވަނީ ފާހަގަކުރައްވައިފައެވެ. ނަމަވެސް ފަންނާނުންނަށް ބޭނުންވާ ކުރިއެރުމާ ގާތަށް ވެސް, އެމީހުން ގެނެސްދެވިފައި ނުވާކަމީ ހުސްކަމެއް ކަމަށާއި, އެ ހުސްކަން ފުރާލުމަށް ސަރުކާރުން މަސައްކަތް ފަށާފައިވާކަމަށް ވިދާޅުވިއެވެ.
