އައްޑޫ ސިޓީގެ ލިންކް ރޯޑުގެ މެދުގައި ހުރި ރުއްތައް ކަނޑާލުމުން ގިނަ ބަޔަކު އަންނަނީ އެކަމަށް ފާޑުކިޔަމުންނެވެ. އަދި އެސަރަހައްދަކީ ރީތި ހިއްގައިމު އަދި އައްޑޫ ސިޓީގެ މުހިއްމު ހިސާބެއް ކަމުން ރުއްތައް ކެނޑުމަކީ ބަލައިގަނެވޭނެ ކަމެއް ނޫން ކަމަށް އެފަރާތްތަކުން އަންނަނީ ބުނަމުންނެވެ.
މިކަމާއި ގުޅިގެން އެ ސިޓީގެ މޭޔަރު އަލީ ނިޒާރު ވިދާޅުވީ، އެ ރުއްތައް ކަނޑާލީ، ރުއްތަކުގެ ސަބަބުން އެ މަގުން ދުއްވާ ފަރާތްތަކަށް ގެއްލުން ވަމުން އަންނަ ކަމުގެ ޝަކުވާ ކައުންސިލަށް ލިބުމުން ކަމަށާއި، އެ ރުއްތަކަކީ، ގިނަ ދުވަސްވެ މުސްކުޅިވެފައިވާ ރުއްތަކެއް ކަމަށެވެ. އަދި ކަނޑާލި ރުއްތަކުގެ ބަދަލުގައި އާ ރުއްތައް އެ ތަނުގައި އިންދުމަށް ހަމަޖެހިފައި ވާކަމަށްވެސް ނިޒާރު ވަނީ ވިދާޅުވެފައެވެ.
މިކަމާއި ގުޅިގެން އީޕީއޭއާއި ސުވާލު ކުރުމުން އީޕީއޭއިން ބުނީ، ރުއްތައް ކެނޑުމަކީ މައްސަލައެއް ނޫން ކަމަށާއި، ރުއްތަކުގެ ސަބަބުން މީހުންނަށް ގެއްލުން ވަމުން އަންނަ ކަމުގެ ޝަކުވާ އެ އޭޖެންސީއަށް ވެސް ލިބިފައި ވާކަމަށެވެ. އަދި މީގެ ކުރިން އެހެން ރައްތަކުގެ ތަރައްގީގެ މަޝްރޫއުތައް ހިންގުމަށްވެސް ރުއްތައް ކަނޑަން ޖެހިފައި ހުރި ކަމަށްވެސް އީޕީއޭއިން ވަނީ ބުނެފައެވެ.
އައްޑޫ ސިޓީގެ ލިންކު ރޯޑުގައި ހުރި ރުއްތައް ކެނޑުމުގެ ކުރިން ކައުންސިލުން ވަނީ އީޕީއޭއިން ނަގަންޖެހޭ ހުއްދަ ނަގާފައިއެވެ.
