އަންނަ މެއިމަހުގެ 14 ގައި ބާއްވަން ހަމަޖައްސާފައިވާ ޗެއާޕާސަން އިންތިހާބުގައި ފައްޔާޒުގެ އިތުރުން ވާދަކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) އެވެ. ފައްޔާޒަކީ ރައީސް ސޯލިހުގެ ފަަޅިން ހުންނެވި ކެންޑިޑޭޓު ކަމަށާއި, އިންތިއަކީ ރައީސް ނަޝީދުގެ ފަޅިން ހުންނެވި ކެންޑިޑޭޓުކަމަށް ސިޔާސީ މަސްރަހު ދިރާސާކުރައްވާ ބޭފުޅުން ވިދާޅުވެއެވެ. އިންތިހާބުގެ ފޯރިގަދަވެފައިވާއިރު އެމްޑީޕީގެ ތެރޭގައި ވެސް ވަނީ ދެބަސްވުންތައް އުފެދިފައެވެ.
ސީއެންއެމްއާއި ވާހަކަދައްކަވަމުން މޫސަ ވިދާޅުވީ ރައީސް ނަޝީދަށް މި ފަހަރުގެ އިންތިހާބު ކާމިޔާބު ކުރެއްވޭނެކަމަށް ގަބޫލު ނުކުރައްވާ ކަމަށެވެ. އަދި އިންތިގެ ކެމްޕޭން ކަންތައްތަކުގައި މަޖިލީހުގެ ނައިބު ރައީސް އީވާ އަބްދުﷲ ބަހައްޓަވާފައި އެ ހުންނަވަނީ ''ބަލިވާތަން ނުދައްކަން'' ކަމަށް ވެދާނެކަމަށް ވެސް މޫސަ ވިދާޅުވިއެވެ.
ރައީސް ނަޝީދު އަދި ރީކޯ މޫސަ ---
މޫސަ ވިދާޅުވީ ރައީސް ސޯލިހު ބޭނުންވެވަޑައިގަންނަވަނީ ފައްޔާޒުލައްވައި އެމްޑީޕީ ހިންގުވަން ކަމަށެވެ. އަދި ގައުމީ މަޖިލީހުގައި މެންބަރުން ދޭ ވޯޓު ބިނާވެގެންވަނީ ވެސް އެ ގޮތަށްކަމަށް މޫސަ ވިދާޅުވިއެވެ.
ރައީސް ޞާލިޙާއި ރީކޯ މޫސަ ބައްދަލުކުރައްވަނީ. ފޮޓޯ:މޫސަ/ޓްވިޓާ
އެހެންކަމުން މި ފަހަރު ހޮވޭނީ ފައްޔާޒު ކަމަށާއި, އެ ހިސާބުން ނަޝީދު އަމިއްލަފުޅު ޕާޓީއެއް ހައްދަވާނެކަމަށް ގަބޫލުކުރެއްވޭކަމަށް ވެސް މޫސަ ވިދާޅުވިއެވެ. އަދި ފެއިލްވެގެންދާ ކޮންމެ މީހަކު ވެސް ހަދާ ގޮތަކީ އެއީ ކަމަށް ވެސް މޫސަ ވިދާޅުވިއެވެ. ހަމައެހެންމެ ސިޔާސީ މަސައްކަތް ކުރައްވަންޏާ ދެން އެމްޑީޕީތެެރެއަކުން ރައީސް ނަޝީދަށް ދެން އެ ބާރެއް ނުލިބޭނެ ކަމަށާއި, ދެން ޖެހޭނީ އަމިއްލަފުޅު ޕާޓީއެއް ހައްދަވައިގެން ރައީސް މައުމޫނަށްވީހެން ކޯނަރެއްގައި އިންނަވަންކަމަށް ވެސް މޫސަ ވިދާޅުވިއެވެ.
މޫސަ ވަނީ އެމްޑީޕީގެ އެތެރޭގެ އިންތިހާބުތަކުގައި ރައީސް ނަޝީދު ވޯޓު އޮޅުވަައިލައްވަން މަސައްކަތް ކުރައްވާނެކަމަށް ވެސް ތުހުމަތު ކުރައްވާފައެވެ.
