އުމުރުން 13 އަހަރުގެ ފިރިހެން ކުއްޖެއްހެ އަތުން 2018 ވަނަ އަހަރުގެ އޮގަސްޓު ހަތް ވަނަ ދުވަހު މާވެޔޮމަގުގައި ހުންނަ ޖިލްބާބު ފިހާރަ ކައިރިން ދަނިކޮށް އެ ކުއްޖާގެ އަތުގައި އޮތް އަސުސް ޒެން ދެ ފޯނު ފޭރިގެން މައްސަލާގައި ތިން މަސް ދުވަހުގެ މުއްދަތަށް ޖަލަށްލާން ހުކުމް ކުރީ ސ.ހުޅުދޫ/ސީވޭވް, އަލީ ނަހްދާން މައްޗަށެވެ.
މި މައްސަލައިގައި ނަހްދާންގެ މައްޗަށް އުފުލި ''އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމުގެ ކުށުގެ ދައުވާ'' އަށް އޭނާ ފުރަތަމަ އިންކާރު ކުރުމުން ނަހްދާން އާ ދެކޮޅަށް ދައުލަތުން ހަ ހެއްކެއް ހުށަހެޅި އެވެ. ދިފާއީ ހެކި ހުށަހަޅަން ދިން މުއްދަތުގައި ނަހްދާންގެ ފަރާތުން އެއްވެސް ހެއްކެއް ހުށަހަޅާފައެއް ނުވެ އެވެ.
މި މައްސަލައިގައި ހެކިންގެ ހެކިބަސް ނަގައި ނިމުުމުން ނަހްދާން ދައުވާއަށް އިއުތިރާފުވިއެވެ. އަދި އޭނާ ދައުވާއަށް އިއުތިރާފުވަނީ އެއްވެސް މަޖުބޫރުކަމެއް ނެތިކަމަށް ވެސް ކޯޓުގައި ބުނެފައިވެއެވެ. ނަހްދާން ދައުވާއަށް އިއުތިރާފުވުމުން މައްސަލަ ނިންމީ އަވަސް ނިޔާގެ މައްސަލައެއްގެ ގޮތުގައެވެ.
މި މައްސަލައިގައި ނަހްދާން ދައުވާއަށް އިއުތިރާފުވެފައިވާތީ ކޯޓުން އިއްޔެ ހުކުމްކުރީ ތިން މަސްދުވަހުގެ މުއްދަތަށް އޭނާ ޖަލަށްލުމަށެވެ. ނަމަވެސް މި މައްސަލައާ ގުޅިގެން 16 ދުވަހު އޭނާ ބަންދުގައި ހޭދަކޮށްފައިވާތީ ހުކުމް ދެން ތަންފީޒުކުރަން ޖެހޭނީ ދެ މަހާއި 14 ދުވަހުގެ މުއްދަތެއްކަމަށް ވަނީ ކަނޑައަޅާފަ އެވެ.
