އަމަލު ކުރަމުން ގެންދާ ޤާނޫނު އަސާސީއަށް 13 އަހަރު ވެފައިވާއިރު، އޭގައި ހުރި ބައެއް ކަންކަމާއި ގުޅޭ ގޮތުން ވިސްނާންވެއްޖެކަމީ މިޤައުމުގެ ކަންކަމާއި ވިސްނާ އެކަކުވެސް ދެބަސްވާނެ ހަޤީގަތެއް ނޫން ކަމަށް ވިދާޅުވެ، "މުޅިރާއްޖޭގެ ފަރާތުން ވަކާލާތު ކުރުން" މިނަމުގައި މިއަދު ރައީސް ނަޝީދު ނެރުއްވި ބަޔާނެއްގައި ބުނެފައިވަނީ، ރައީސުލްޖުމްހޫރިއްޔާ އިންތިހާބު ކުރުމުގައި އެންމެ ގިނަ ވޯޓް ހޯދޭ ކެންޑިޑޭޓް އަކީ މޮޅުވާ ކެންޑިޑޭޓުގެ ގޮތުގައި ކަނޑައެޅުން ބޭނުންތެރި ކަމަށެވެ.
އަމަލު ކުރަމުން މިގެންދާ ޤާނޫނު އަސާސީގެ ދަށުން ތިން ފަހަރަށް ރިޔާސީ އިންތިހާބު ބޭއްވުނު އިރުވެސް އާންމު ހަމައެއްގެ ގޮތުގައި ފެނުނީ ދެ ވަނަ އަށް އެންމެ ގިނަ ވޯޓް ހޯދާ ޕާޓީ ރިޔާސީ އިންތިހާބު ކާމިޔާބުކުރާތަން ކަމަށް ނަޝީދު ވިދާޅުވި އެވެ.
ނަޝީދު ވަނީ، 30 އަހަރުވަންދެން ވެރިކަން ކުރަމުން އައި ރައީސް މައުމޫން 2008 ވަނަ އަހަރުގެ އިންތިހާބުގައި ބަލިކޮށް ނަޝީދު ވެރިކަމަށް އައީ އެންމެންގެ ރުހުން ލިބިގެން ކަމަށް ބުނުމަކީ ދޮގެއްގެ މައްޗަށް ދެކެވޭ ދެކުމެއް ކަމަށް ވެސް އިއުތިރާފުވެވަޑައިގެންފަ އެވެ.
އެގޮތަކީ އެ އަހަރު ވެރިކަން ނަޝީދު ހޯއްދެވީ ދެ ވަނަ ބުރަކަށް ގޮސް ހުރިހާ ޕާޓީތައް ގުޅިގެން ކަމަށް ވުމުންނާއި، 2008 ވަނަ އަހަރު ފުރަތަމަ ބުރުގައި ހަގީގަތުގައި އެންމެ ގިނަ ވޯޓު ލިބުނީ ރައީސް މައުމޫން އަށް ކަމަށް ވުމުން ކަން ނަޝީދު ފާހަގަ ކުރެއްވި އެވެ.
ވިދިގެން އައި 2013ވަނަ އަހަރު ރިޔާސީ އިންތިހާބުގައިވެސް އަސާސީ އުސޫލު ދިޔައީ އެއްހަމައެއްގައި ކަން ފާހަގަ ކުރައްވަމުން އެބަޔާނުގައި ބުނެފައިވަނީ އެންމެ ގިނަ ވޯޓް ލިބުނީ ރައީސް ނަޝީދަށް ނަމަވެސް ރައީސްކަމަށް ހުވާކުރެއްވީ ރައީސް އަބްދުﷲ ޔާމީން އަބްދުލް ޤައްޔޫމު ކަމަށެެވެ. އޭގެ ފަހުން ދެން ބައްދަލު ކުރި 2018 ވަނަ އަހަރުގެ ރިޔާސީ އިންތިހާބުގައި ވެސް އަދި އަމުދުން އެގޮތް ދިޔައީ ބޮޑުވެގެން ކަމަށް ރައީސް ނަޝީދު ފާހަގަ ކުރެއްވި އެވެ.
ޕާޓީއަކަށް އަޤްލަބިއްޔަތު ވޯޓް ހޯދިފައެއް ނުވެއެވެ. އަޤްލަބިއްޔަތު ވޯޓް ހޯދުމަކީ އެއްވެސް މިނިވަން މުޖްތަމައުއެއްގައި ފަސޭހަކަމެއް ނޫނެވެ. ވަރަށް މަދުން ނޫނީ ނުވާކަމެކެވެ." ރައީސް ނަޝީދުގެ ބަޔާނުގައި ވެއެވެ.
އެ ބަޔާނުގައި އިތުރަށް ފާހަގަކޮށްފައިވާ ގޮތުން، ރާއްޖޭގެ ސިޔާސީ ތޮބިއްޔަތު އޮތްގޮތުން ބޮޑު ދެ ޕާޓީ،(އެމްޑީޕީ އާއި އަދި ޕީޕީއެމް) އަށް ވެސް ތާއިދު އޮންނަނީ ދާދި އެއް މިންވަރެއްގައެވެ. އެއީ 35 އިންސައްތަ އާއި 45 އިންސައްތަ އާއި ދެމެދުގައެވެ. މި ދެ ޕާޓީމެ، އިންތިހާބު ކާމިޔާބު ކުރުމަށް އެހެން ކުދި ޕާޓީ ތަކާ ގުޅޭން ޖެހެ އެވެ. މި ގުޅުމަކީ ވަރަށް އަގުބޮޑު ގުޅުމެކެވެ. 2018 ވަނަ އަހަރުގެ ރިޔާސީ އިންތިހާބުގެ ކުރީގައި، މި ފަސް އިންސައްތަ ވޯޓު ހޯދުމަށް ޓަކައި އެމްޑީޕީ ވަނީ އެމީހުންގެ ސަރުކާރުގެ ކެބިނެޓްގެ 60 އިންސައްތަ ދޫކޮށްފައި ކަމަށާއި، ފަސް އިންސައްތަ ރައްޔިތުން އެދޭ ގޮތަށް ކަންކަން ގެއްދިއުމަށް 45 އިންސައްތަ ރައްޔިތުންގެ އުންމީދުތައް ފެންކޮށްލަނީ ކަމަށް ނަޝީދު ވިދާޅުވިއެވެ.
އެފަދަ ބޭއިންސާފުގައި ވެރިކަމުގެ ކަންކަން ގެންދަނީ ނަމަ އެތައްގޮންޖެހުމަކާއި ކުރިމަތިލާންޖެހޭނެ ކަން ފާހަގަކޮށް ބަޔާނުގައި ވަނީ ގިނަ ބައިވަރު މީހުނަކީ ބާކީވާ މީހުން ކަމުގައި ދެކެނީ ނަމަ ހިތި ނަތީޖާތައް ޤައުމުތަކުގެ ހަޔާތުގައި ފެންނާނެކަން ވަނީ ސާފު ވެފައި ކަމަށެވެ.
ނަޝީދު އިތުރަށް އެބަޔާނުގައި ވިދާޅުވެފައިވަނީ، އިއްތިހާދު މެދުވެރިކޮށް ކާމިޔާބު ކުރާ ރިޔާސީ އިންތިހާބަށް ފަހުގައި، އެކުލަވާލެވޭ ވަޒީރުންގެ މަޖިލީހުގެ މެންބަރުން ކަނޑައެޅުމުގެ ޝަރުތުތަކެއް ގާނޫނު އަސާސީއަށް އިތުރުކުރުން ވެސް ބޭނުންތެރި ކަމަށާއި، އެ ޕާޓީއަކުން މަޖިލީހުގައި ތަމްސީލު ވާ މިންވަރާއި އަދި ކައުންސިލުތަކުގައި ތަމްސީލުވާ މިންވަރު އެއީ ޕާޓީތަކަށް ތާއިދު އޮތް މިންވަރު އަންގުވާދޭ ތަރާދުތަކެއް ކަމަށެވެ.
އަދި އެކުލަވާލެވޭ އިއްތިހާދު ސަރުކާރުގައި ވަޒީރުންނާއި އަދި އެހެނިހެން ސިޔާސީ މަގާމުތަކަށް މީހުން ކަނޑައެޅުމުގެ ހެޔޮ ގޮތަކީ އެ ޕާޓީއަކަށް ރައްޔިތުންގެ ތާއިދު އޮތް މިވަރެއްގެ މައްޗަށް ބިނާކޮށް، ޕާޓީތަކަށް ޖާގަ ދިނުން ކަމަށް ވެސް ރައީސް ނަޝީދުގެ އެ ބަޔާނުގައި ވެއެވެ.
