"ތިލަފަތުގެ ރަމްޒު" އިންތިގެ މެނިފެސްޓޯ އިފްތިތާހު ކުރުމަށް މިރޭ ގދ. ތިނަދޫގައި ބޭއްވި ޖަލްސާގައި ވާހަކަދައްކަވަމުން އިމްތި ވިދާޅުވީ، އެމްޑީޕީގެ ރޫހު ދަމަހައްޓާ، ޕާޓީގެ އިތުބާރު ދެމެހެއްޓުމަށް ލިބޭނެ އެންމެ ރަނގަޅު އެއް ފުރުސަތަކީ މިހާރު ލިބިފައިވާ ފުރުސަތު ކަމަށެވެ.
މިހާރު އޮތީ އެމްޑީޕީގެ ސަރުކާރެއް، އަދި ޕާޓީގެ ސުޕަމެޖޯރަޓީ އޮތް ރައްޔިތުންގެ މަޖިލީހެއްކަން ފާހަގަކުރައްވަމުން އޭނާ ވިދާޅުވީ، ނަމަވެސް ހިތާމައަކީ މިއަދު އެކަން އޮތީ އެންމެ ހިތް އެދޭ ގޮތަށް ކަމަށް ނުވުމުން ކަމަށެވެ.
އެގޮތުން އެތެރޭގެ މުހިންމު އިންތިހާބެއް ބޭއްވުމަށް ތައްޔާރުވަމުންދާ މިދަނޑިވަޅަކީ ރީތި ގޮތުގައި ކެމްޕެއިންނެއް ކުރަންޖެހޭ ހާލަތެއް ނަމަވެސް ސަރުކާރަށް ނިސްބަތްވާ ބައެއް ވަޒީރުންނާއި، ކުންފުނިތަކުގެ ވެރިން "ހެސް ކިޔާފައި" ކެމްޕެއިން ކުރަމުންދާ ކަމަށާއި، އަދި އެބޭފުޅުންގެ ދަށުގައި ތިބޭ މުވައްޒަފުންނަށް ވަކި ގޮތަކަށް ވޯޓުލުމަށް މަނާ ކުރަމުންދާ ކަމަށް އިމްތި ތުހުމަތު ކުރެއްވި އެވެ.
ފޭސްބުކުގައި ޕޯސްޓެއް ކޮށްލުންވެސް މަނާކޮށް އެކަން ކޮށްފިނަމަ ވަޒީފާގެ މަސްއޫލިއްޔަތުތަކުން ވަގުތީ ގޮތުން ދުރުކުރާ ހިސާބަށް ކަންކަން ގޮސްފައިވާ ކަމަށާއި، އެމްޑީޕީގެ އުސޫލުތަކަކީ އެއީ ނޫން ކަމަށް އިމްތި ވިދާޅުވިއެވެ.
އިމްތި ވިދާޅުވީ، އެމްޑީޕީ އުފެދުނީ ހިޔާލުފާޅުކުރުމާއި އެމީހަކު ތާއީދުކުރަން ބޭނުންވާ މީހަކަށް އެމިނިވަންކަން ހޯދައިދީ، ބިރުން އެއްކިބާވެގެން ވޯޓު ކަރުދާސް ފޮއްޓަށް ވައްޓާލުމުގެ ހައްގު ހޯދުމަށް ކަމަށެވެ. އަދިވެސް އެ ހައްގު ހޯދާނެ ކަމަށާއި، ޕާޓީ ނަގަހައްޓާނެ ހަމަތަކާއި އުސޫލުތަކަކީ އެއީ ކަމަށެވެ.
