އިންތިގެ ކެމްޕޭން ޓީމުން މި ހަފުތާ ބަންދުގައި ކެމްޕޭނު ކުރަމުން ދަނީ ހުވަދު އަތޮޅުގެ ރަށްރަށުގައެވެ. އެ ގޮތުން ގއ.ދާންދުއަށް މިއަދު ވަޑައިގެން އެ ރަށުގެ އެމްޑީޕީ މެންބަރުންނާއި މުހާތަބު ކުރައްވައި ވާހަކަދައްކަވަމުން އިންތި ވިދާޅުވީ އެމްޑީޕީ ބައިބައި ކުރުމަށް ބަޔަކު އެބަ މަސައްކަތް ކުރާ ކަމަށާއި, އެއީ ހަގީގަތެއް ކަމަށެވެ. ހަމައެހެންމެ ޕާޓީތެރެއިން ނަޝީދު ބޭރުކުރަން މަސައްކަތް ކުރާ ކަމަށާއި, ނަމަވެސް އެ ޖާގަ ދެވިގެންނުވާނެކަމަށް އިންތި ވިދާޅުވިއެވެ.
އިންތި ވިދާޅުވީ ދާންދޫގެ ރައްޔިތުންނަށް ވެސް އަދި އެމްޑީޕީގެ މެންބަރުންނަށް ވެސް ރައީސް ނަޝީދަކީ ކޮން ބޭފުޅެއްކަން ރަނގަޅަށް އެނގޭނެ ކަމަށެވެ. އަދި އެ މަނިކުފާނު އެމްޑީޕީއަށް ވެވަޑައިގެންނެވި ގުރުބާނީ މިއަދާއިި ހަމައަށް ވެސް ހިފަހައްޓަވަމުން ގެންދަވާކަން އިންތި ފާހަގަކުރެއްވިއެވެ.
ދާންދޫގެ އެމްޑީޕީ މެންބަރުންނާއި މުހާތަބު ކުރައްވައި ވާހަކަދައްކަވަމުން މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ 2023 ގެ ރިޔާސީ އިންތިހާބު ކައިރިވަނީ ކަމަށާއި, އެމްޑީޕީ ބައިބައިކޮށްގެން ރައީސް ނަޝީދު ބޭރުކޮށްގެން ލިބޭނެ އެއްވެސް ކާމިޔާބެއް ނެތް ކަމަށެވެ.
އީވާ ވިދާޅުވީ 2023 ކާމިޔާބުކުރަން ބޭނުންވާނަމަ ''އެއް އަޑަކުން އެއް ހަރަކުން އެއް އަސާސްތަކެއްގަ'' ހިފައިގެން މަސައްކަތް ކުރަންޖެހޭ ކަމަށެވެ. އަދި ޕާޓީ ބައިބައި ނުކުރާނީ ވެސް, ޕާޓީ އެއްގޮތެއްގައި ބާއްވާނީ ވެސް އިންތިކަމެދަކު ޝައްކެއް ނެތްކަމަށް ވެސް އީވާ ވިދާޅުވިއެވެ.
އަންނަ މެއި މަހުގެ 14 ގައިި ބާއްވަން ހަމަޖެހިފައިވާ އެމްޑީޕީގެ ޗެއާޕާސަން އިންތިހާބުގައި އިންތިގެ އިތުރުން ދެން ވާދަކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލެވެ.
