އެ މައްސަލަ ފެންމަތިވެފައި ވަނީ އެއާބަސް ކުންފުންޏާ ދެކޮޅަށް ކުރެވޭ ކޮރަޕްޝަނުގެ ތުހުމަތުތަކާ ގުޅިގެން ހަތަރު ބިލިއަން ޑޮލަރުގެ ޖޫރިމަނާ ދެއްކުމާ އެކުއެވެ.
މެލޭޝިއާގެ އެންޓި ކޮރަޕްޝަން ކޮމިޝަނުން އެ މައްސަލަ ބަލަން ފެށުމާއެކު އެއާ އޭޝިއާގެ ހިއްސާގެ އަގުތައް ވަނީ 11 އިންސައްތަ ވެއްޓިފަ އެވެ.
އެކި ކުންފުނިތަކަށް ރިޝްވަތު ދީގެން އެއާބަސްގެ ބޯޓުތައް ވިއްކި ކަމަށް ކުރެވޭ ތުހުމަތާ ގުޅިގެން، ކޯޓުން ބޭރުން ހައްލެއް ހޯދައި، ޖޫރިމަނާ ދައްކާފައި ވަނީ ވަނީ ހުކުރު ދުވަހު އެވެ.
ފްރާންސް، އިނގިރޭސިވިލާތް އަދި އެމެރިކާއިން ވެސް ވަނީ އެއާބަސްއާ ދެކޮޅަށް ކުރެވޭ ތުހުމަތުތައް ތަހުގީގުކޮށްފަ އެވެ. އެކަމަކު އެއާ އޭޝިއާއިން ބުނީ އެ ކުންފުންޏާ އެއާބަސްއާ ގުޅުވައިގެން ފަތުރަނީ ދޮގު ވާހަކަ ކަމަށެވެ.
މެލޭޝިއާ އާއި އިނގިރޭސިވިލާތް ގުޅިގެން ކުރާ ތަހުގީގަށް އެއްބާރުލުން ދޭނެ ކަމަށް ވެސް އެއާ އޭޝިއާއިން ވަނީ ބުނެފަ އެވެ.
މި މައްސަލަ ފެންމަތިވެފައި މި ވަނީ ކޮރޯނާ ވައިރަހުގެ ސަބަބުން އެއާ އޭޝިއާގެ ވިޔަފާރިއަށް ވަރަށް ބޮޑަށް އަސަރުކޮށްފައިވާ ދަނޑިވަޅެއްގަ އެވެ.
