"ނޭވާ ހޮޅިއަށް'' މުޒާހަރާގައި ފުލުހުންގެ ވާޖިބަށް ހުރަސްއެޅިކަމުގެ ތުހުމަތުގައި 17 މީހަކު ހައްޔަރުކުރި އިރު އެ މީހުންގެ ބަންދާމެދު ގޮތެއް ނިންމަން އިއްޔެ ވަނީ ކްރިމިނަލް ކޯޓަށް ހާޒިރުކޮށްފަ އެވެ.
އެކަމުގެ ތަފްސީލު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ހައްޔަރުކުރި 17 މީހުންގެތެރެއިން ތިން މީހެއްގެ ބަންދަށް ކޯޓުން ތިން ދުވަސް ދީފައިވާ ކަމަށެވެ. އަދި ދެ މީހަކު ހަތް ދުވަހަށް ބަންދުކުރަން އަމުރުކުރި އިރު, ހަތަރު މީހަކު ދެ ދުވަހަށް ބަންދުކުރަން ކޯޓުން އަމުރުކުރި ކަމަށެވެ.
ހަމައެހެންމެ އަށް މީހަކު ދޫކޮށްލިއިރު, އޭގެތެރެއިން ހަ މީހުން ދޫކޮށްލީ ޝަރުތުތަކާއެކު ކަމަށާއި, ދެ މީހަކު ދޫކޮށްލީ އެއްވެސް ޝަރުތަކާ ނުލައި ކަމަށެވެ.
ބަންދުގެ މުއްދަތު ޖެހި މީހުންގެތެރޭގައި މުޒާހަރާ ނުފަށަނީސް ހައްޔަރުކުރި މާލޭގެ ޑެޕިއުޓީ މޭޔަރު އަހްމަދު ނަރީޝާއި, ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއީލް ހިމެނެ އެވެ. ނަރީޝަށް ދެ ދުވަސް ޖެހިއިރު, މުހައްމަދު އިސްމާއީލްގެ ބަންދަށް ޖެހީ ހަތް ދުވަހެވެ.
މީގެ އިތުރުން ޝަރުތުތަކާއެކު ދޫކޮށްލި މީހުންގެ ތެރޭގައި މާވަށު ދާއިރާގެ މެންބަރު އަދި ޕީއެންސީގެ ނައިބު ރައީސް މުހައްމަދު ސައީދާއި, ތ.ގުރައިދޫ ދާއިރާގެ މެންބަރު އަދި ޕީޕީއެމްގެ ނައިބު ރައީސް މުހައްމަދު ގައްސާން މައުމޫން ހިމެނެއެވެ. ނަމަވެސް އެއީ ކޮން ޝަރުތުތަކެއްކަމެއް ފުލުހުން ހާމައެއް ނުކުރެ އެވެ.
