މަޖިލީހުގެ މިއަދުގެ ޖަލްސާގައި މި މައްސަލަ ހުށަހެޅުއްވީ މަޑުއްވަރީ ދާއިރާގެ މެންބަރު އާދަމް ޝަރީފެވެ.
ޝަރީފް ހުށަހެޅުއްވި މައްސަލައިގައި ވަނީ ރައްޔިތުން މަޖިލީހުގެ މެންބަރަކު ވަޒީރުންގެ މަޖިލީހުގެ މެންބަރަކާއި ކުރާ ކޮންމެ ސުވާލަކަށް ޖަވާބުދޭންޖެހޭނެކަމަށް ގާނޫނުއަސާސީގެ 98 ވަނަ މާއްދާގައި ބަޔާންކޮށްފައިވާކަން ފާހަގަ ކުރައްވާފަ އެވެ.
އެކަން ފާހަގަކުރައްވައި ޝަރީފް ވިދާޅުވީ ކޯޓުތަކުގައި މައްސަލަތައް ލަސްވުމާއި ގުޅޭ ގޮތުން ރައްޔިތުން މަޖިލީހުގެ ޖުޑިޝަރީ ކޮމިޓީން 17 ފެބްރުއަރީގައި ބޭއްވި ބައްދަލުވުމުގައި ފުލުހުންނާއި, ތަހްގީގީ އެހެނިހެން އިދާރާތަކުގައި ވެސް ގޯސް ހަދާ ފަރާތްތައް އެބަ ތިބި ކަމަށާއި, އެފަދަ ފަރާތްތަކުން ގޯސް ހަދަނީ ރޭވިގެން އިންތިޒާމުވެގެން ކުރެވޭ ކަމެއްގެ ގޮތުގައިކަމަށް އެޓާނީ ޖެނެރަލް އިބްރާހިމް ރިފްއަތު ވިދާޅުވެފައިވާ ކަމަށެވެ.
އަދި އެކަމާ ބެހޭ ގޮތުން ރައްޔިތުންގެ މަޖިލީހުގެ މެންބަރަކު ސުވާލު ކުރެއްވުމުން މިނިސްޓަރު އިމްރާން ލިޔުމުން ދެއްވި ޖަވާބުގައި ގަސްދުގައި ގޯސް ހަދާ ފުލުހުންނެއް ނެތްކަމަށް ވިދާޅުވެފައިވާކަން ވެސް ޝަރީފް ފާހަގަ ކުރެއްވި އެވެ. އެ ގޮތުން ކޮންމެ ވެސް އެއް ވަޒީރަކު އިތުރުފުޅު ހައްދަވާކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެފައިވާކަމަށް ވެސް ޝަރީފް ފާހަގަ ކުރެއްވި އެވެ.
އެހެންވެ ޝަރީފް ހުށަހެޅުއްވީ ރައްޔިތުން މަޖިިލީހުގައި އިތުރުފުޅު ހެއްދެވުމުގެ ސަބަބުން އެޓާނީ ޖެނެރަލް އިބްރާހިމް ރިފްއަތު ނުވަތަ އިމްރާން އަބްދުﷲ ގާނޫނުއަސާސީގެ 98 ވަނަ މާއްދާއާއި ހިލާފުވެފައިވާކަމަށް ގަބޫލުކުރެވޭތީ, އެކަން ސަރުކާރުގެ ސަމާލުކަމަށް ގެނައުމަށާއި, ގާނޫނާއި ހިލާފުވި ވަޒީރު ދެނެގަނެ އެ ވަޒީރަށް ފިޔަވަޅު އަޅައިދިނުމަށެވެ.
މި މައްސަލަަަ މަޖިލީހަށް ބަލައިގަނެ ބަހުސް ފަށާފައިވާއިރު ގިނަ މެންބަރުން ވަނީ އިމްރާން އިތުރުފުޅު ހައްދަވާކަމަށް ތުހުމަތު ކުރައްވައި ވާހަކަ ދައްކަވާފަ އެވެ.
އެ ގޮތުން މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވީ މި މައްސަލައަކީ ކަނޑައެޅިގެން މަޖިލީހުގެ އިމްތިޔާޒާއި ގުޅިފައިވާ ކަމެއް ކަމަށެވެ.
އީވާ ވިދާޅުވީ ދުނިޔޭގެ ހުރިހާ ގައުމެއްގެ ފުލުހުންގެ އިދާރާތަކުގައި ވެސް ގަސްދުގައި ގޯސް ހަދާ ފުލުހުން ތިބޭ ކަމަށެވެ. އަދި ރާއްޖޭގައި ވެސް އެފަދަ ފުލުހުން ތިބޭކަމަށް އެޓާނީ ޖެނެރަލް ވިދާޅުވާނީ ކޮންމެވެސް ހަގީގަތެއް އޮތުމުންކަމަށް އީވާ ވިދާޅުވި އެވެ.
ބިލެތްދޫ ދާއިރާގެ މެންބަރު އަހްމަދު ހަލީމް ވިދާޅުވީ ދެ ވަޒީރަކު ދެ ވާހަކައެއް ދެއްކެވީމާ އެ ވާހަކައަށް ފާރަލައި ބަލަންޖެހޭނެ ކަމަށެވެ. އަދި ފުލުސް އޮފީހުގައި ގޯސް ހަދާ ފުލުހުން ތިބިކަން އެއީ ރާއްޖޭގެ ހުރިހާ ރައްޔިތުން ވެސް ގަބޫލުކުރާ ހަގީގަތެއްކަމަށް ހަލީމް ވިދާޅުވިއެވެ.
ނައިފަރު ދާއިރާގެ މެންބަރު އަހްމަދު ޝިޔާމް ވިދާޅުވީ ކުދި ސޯބުތައް އެނބުރޭނީ ބޮޑު ސޯބު އެނބުރޭ ގޮތަށް ކަމަށާއި, ރައީސުލްޖުމްހޫރިއްޔާއަކަށް ހުންނެވި ބޭފުޅާ ވެސް ކޮންމެ އަހަރެއްގައި މަޖިލީހަށް ވަޑައިގެން ހައްދަވަނީ އިތުރުފުޅު ކަމަށެވެ.
އަދި މީގެކުރިން އިމްރާން މަޖިލީހަށް ހާޒިރުކުރިއިރު ވެސް, އެތައް ފަހަރަކު އިތުރުފުޅު ހެއްދެވި ކަމަށާއި, މޭޑޭގެ މުޒާހަރާގެ ކަންތަކުގައި ވެސް ހެއްދެވީ އިތުރުފުޅުކަމަށް ޝިޔާމް ވިދާޅުވިއެވެ.
މައްސަލައަށް ބަހުސް ކުރަން ލިބިވަޑައިގެންނެވި ފުރުސަތުގައި މާވަށު ދާއިރާގެ މެންބަރު މުހައްމަދު ސައީދު ވިދާޅުވީ ބަޣާވާތޭ ބުނި މީހާ ހުރީ ހޯމް މިނިސްޓަރަކަށް ކަމަށާއި, އެކަމު އެމްޑީޕީ ވެސް އޮތީ ހަނު ކަމަށެވެ.
މީގެ އެއް ދުވަސްކުރިން ދޫނިދޫގައި ބަންދުގައި ބެހެއްޓި ސައީދު ވަނީ ޖަލުތަކުގެ ހާލަތާބެހޭ ގޮތުން ބެސް ފާޑުވިދާޅުވެފައެވެ. ސައީދު ވިދާޅުވީ އޭނާ ހުންނެވި ގޮޅީގެ ފާހާނައިގެ މަތީގައި ކެމެރާ ހަރުކޮށްފައިވާ ކަމަށެވެ. އަދި އެއީ އިމްރާން ޖަލަށް ގެނެސްފައި ހުރި އިސްލާހު ކަމަށާއި, އެއީ މީހުންގެ އޮރިޔާން ބަލަން އިމްރާން ޖަލަށް ގެންނެވި އިސްލާހެއްތޯ ވެސް ސައީދު ސުވާލު ކުރެއްވިއެވެ.
