މިބިލު ހުށަހެޅުމުގެ ބޭނުމަކީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 35ވަނަ މާއްދާގެ(ހ) ގެ ދަށުން، ކުޑަކުދިންނަށް ހާއްސަ ރައްކާތެރިކަމާއި ހިމާޔަތް ލިބުމަކީ އެކުދިންނަށް ލިބިގެންވާ ހައްގެއް ކަމުގައި ކަނޑައަޅާފައިވީ ނަމަވެސް، ކުޑަކުދިންނަށް ޖިންސީ ގޯނާކުރުމުގެ އަމަލުތައް ދިވެހި މުޖުތަމަޢުގައި ގިނަވެފައިވާތީއާއި އެކުދިންނަށް ކަށަވަރުކޮށްދޭންޖެހޭ ރައްކާތެރިކަން އެކަށީގެންވާ މިންވަރަށް ކަށަވަރުކޮށްދެވިފައިނުވާތީ އެކަން ކަށަވަރުކޮށްދިނުންކަމަށް ބިލުގައި ބުނެފައިވެއެވެ.
ބިލު ހުށަހަޅުއްވަމުން ޖީހާން ވިދާޅުވީ "ޖިނާއީ އިޖުރާއަތުގެ ޤާނޫނުގެ 22ވަނަ މާއްދާގައި ކަނޑައަޅާފައިވާ ޖިނާއީ ބޮޑެތި ކުށްތަކުގެ ތެރޭގައި ކުޑަކުދިންނަށް ޖިންސީ ގޯނާކުރުމުގެ އަމަލު ހިމަނާ އެފަދަ އަމަލުތައް ކުރުން މަދުކުރުމާއި ހުއްޓުވުމުގެ މަގުސަދުގައި ހުށަހަޅާ އިސްލާހެއް،" ކަމަށެވެ.
ޖިނާއީ ބޮޑެތި ކުށްތަކުގެ ގޮތުގައި މިހާރު ހިމެނެނީ މީހުން މެރުމުގެ ކުށާއި، އިންތިޒާމުވެގެން ހިންގާ ބޮޑެތި ޖިނާއީ ކުށާއި، ޓެރަރިޒަމްގެ ކުށާއި، މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުމުގެ ކުށާއި، މީހުން ޓްރެފިކްކުރުމުގެ ކުށާއި، މަސްތުވާތަކެތި ޓްރެފިކްކުރުމުގެ ކުށާއި، ވައްކަމާއި، ޓެކުމާއި، ހިޔާނަތްތެރިވުމާއި، މަކަރާއި ހީލަތް ކޮރަޕްޝަންގެ ކުށާއި ގޭންގު ކުށާއި، މީހެއްގެ ގުނަވަނެއް ނުވަތަ ގުނަވަނެއްގެ ބައެއް ނުވަތަ ހިއްސެއް ނެތިދާފަދަ ގޮތަކަށް މާރާމާރީ ހިންގުމުގެ ކުށުގެ އިތުރުން ދައުލަތުގެ އިސްތިޤުލާލާއި މިނިވަންކަމަށް ގެއްލުންވާ އަމަލު ހިންގުމުގެ ކުށެވެ.
މި ކުށްތަކަކީ ދިގުމުއްދަތައް ޖަލަށް ލުމާއެކު 100,000 (އެއްލައްކަ) ރުފިޔާއިން ފެށިގެން މަތީގެ އަދަދުތަކުން ޖޫރިމަނާކުރެވޭނެއެވެ. ކުށްތަކެވެ.
