މެމްބަރު ސައީދު މިއަދު މަޖިލީހަށް ހުށަހެޅުއްވި މައްސަލައިގައި ބުނެފައިވަނީ ގަމު ރީޖަނަލް ހޮސްޕިޓަލު ޓާޝަރީ ފެންވަރަށް ތަރައްގީ ކުރުމަށް ސަރުކާރުން އިއުލާނު ކޮށްފައިވީނަމަވެސް، އެކަން އަދި ވެފައި ނުވާކަމަށާއި، ހޮސްޕިޓަލުގެ ފެންވަރު ދަނީ ދުވަހުން ދުވަހަކަށް ދަށްވަމުން ކަމަށެވެ.
އަދި ގަމު ހޮސްޕިޓަލަކީ، ދުވާލަކު އެތައް ބަޔަކު ހިދުމަތް ހޯދަމުން އަންނަ ހޮސްޕިޓަލެއް ކަމަށާއި، އެހެން ނަމަވެސް އެކަށީގެންވާ މިންވަރެއްގައި ހޮސްޕިޓަލުން އަދި ހިދުމަތް ނުދޭ ކަމަށެވެ. މީގެ އިތުރުން ސައީދު މައްސަލަ ހުށައަޅުއްވަމުން ބުނެފައިވަނީ، ހޮސްޕިޓަލް ހިންގުމަށްޓަކައި ވަކި ބޯޑެއް ކަނޑައަޅާފައި ވާކަމަށެވެ. އެހެން ނަމަވެސް އެބޯޑުން އެންމެ އެކަށީގެންވާ ވަރަށް މަސައްކަތް ކުރަމުން ނުދާ ކަމަށް ވިދާޅުވިއެވެ.
މީގެ އިތުރުން ސައީދު ވިދާޅުވީ، ހޮސްޕިޓަލުގައި ކޮންމެހެންވެސް ހުންނަންޖެހޭ ޑޮކްޓަރުން ނެތި އެތައް ދުވަހެއް ވެފައި ވާކަމަށާއި، އެހެން ކަމުން، ހޮސްޕިޓަލުގެ ފެންވަރު ރަނގަޅުކޮށް ހިންގުން ހަރުދަނާކޮށް މައްސަލަތައް ވީހާވެސް އަވަހަށް ސަރުކާރުން ހައްލުކޮށްދިނުން އެދިވަޑައިގަންނަވާ ކަމަށެވެ.
މި މައްސަލަ މަޖިލީހަށް ބަލައިގަތުމަށް ނެގި ވޯޓުގައި ބަލައިގަތުމަށް 20 މެންބަރަކު ވަނީ ވޯޓު ދެއްވަވައިފައެވެ. އަދި މައްސަލަ ބަލައިގަތުމަށް ނުފެންނަ ކަމަށް 11 މެންބަރުން ވޯޓު ދެއްވައިފައިވެއެވެ.
