"ސީއެންއެމް" އަށް މައުލޫމާތު ދެއްވަމުން އައިއޭއެސްގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ ވިދާޅުވީ، ބޯޓުތައް ރާއްޖެ ގެނައުމަށް ލަސްތަކެއް ދިމާވީ ރަޝިއާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގެ ސަބަބުން ކަމަށާއި، ކުރިންވެސް ބޯޓުތައް ގެނައުމަށް ލަސްތަކެއް ދިމާވެދާނެކަން ލަފާކުރެވުނު ކަމަށެވެ.
ނަމަވެސް، ބޯޓުތައް މިއަދު ސްރީލަންކާ ބަނދަރަށް ގެނެވިފައިވާކަން ފާހަގަކުރައްވާ ޖެނިފާ ވިދާޅުވީ، މި މަހުގެ 11 ދުވަހު އެ ބޯޓުތައް ރާއްޖެ ގެނެވި، 15 ވަނަ ދުވަހު އައްޑޫއަށް ފޮނުވާލެވޭނެ ކަމަށެވެ. އަދި ދަރިވަރުންގެ ފްލައިން ސެޝަންތައް މި މަހުގެ 28 ވަނަ ދުވަހު ފެށޭނެ ކަމަށްވެސް އޭނާ ވަނީ ވިދާޅުވެފައެވެ.
ކުރިން ބެލެވިފައި އޮތީ އައްޑޫގައި ހިންގާ މި ފްލައިން ސްކޫލަށް ހުސްވި މަހުގެ 29 ވަނަ ދުވަހު ބޯޓުތައް ގެނެއުމަށް ކަމަށްވާއިރު، ދަރިވަރުންގެ ފްލައިން ސެޝަންތައް ފެއްޓުމަށް ތާވަލުކޮށްފައިވަނީ މި މަހުގެ 15 ވަނަ ދުވަހަށެވެ.
މި އަހަރުގެ ޖެނުއަރީ މަހުގެ 10 ވަނަ ދުވަހު ފްލައިން ސްކޫލުގެ ރިފްރެޝާ ޕްރޮގްރާމުގެ ފުރަތަމަ ބެޗްގެ ކިޔެވުން 35 ދަރިވަރުންނާއެކު ކުރިޔަށް ގެންދަނީ އޮންލައިންކޮށެވެ.
ރިފްރެޝާ ޕްރޮގްރާމުގައި 150 ގަޑިއިރުގެ ތިއަރީ ކްލާހާއި 10 ގަޑިއިރުގެ ފްލައިން ކުރިއަށް ގެންދާއިރު، ތިއަރީ ބައިތައް ކުރިއަށް ގެންދާނީ އައްޑޫގައި ހުންނަ އެމްއެންޔޫގެ ކެމްޕަހުގަ އެވެ. އަދި ފްލައިން ކުރިއަށް ގެންދާނީ ގަން އިންޓަނޭޝަނަލް އެއާޕޯޓްގަ އެވެ.
މޯލްޑިވްސް އޭވިއޭޝަން އެކެޑަމީގެ ފުރަތަމަ ބޯޓު މިދިޔަ މަހު އައްޑޫ އަށް ގެންގޮސްފައިވާއިރު، އައްޑޫގައި ކުރިން ފްލައިން ސްކޫލު ހިންގި އެކެޑަމީ އޮފް އެއިރޯނޯޓިކްސް (އޭއޭއޭ) އިން ބޭނުންކުރި ދެ ބޯޓެއްވެސް މޯލްޑިވްސް އޭވިއޭޝަން އެކެޑަމީ އަށް ވަނީ ގަނެފަ އެވެ.
މިއާއެކު، މޯލްޑިވްސް އެވިއޭޝަން އެކަޑަމީގެ ފްލައިން ސެޝަންތައް ހިންގާނީ ޖުމްލަ ހަ ބޯޓާއެކުގައެވެ.
