ރޯދަ ރަށްރަށުން މި އާޓިކަލަށް ރޯދަމަހު އެ ރަށު މީހުން ކުރީގައި ކުރުބާ ލާ އުޅުނު ގޮތް ކިޔައިދޭން ފަށަމުން ގއ. ކަނޑުހުޅުދޫއިން ވާހަކަ ދެއްކި މީހަކު ފުރަތަަމަ ބުނީ މިހެންނެވެ.
އެ ރަށުގައި ރޯދައަށް ކޮށް އުޅުނު ހާއްސަ ކަންކަމުގެ ތެރެއިން އޭނާ ހަދާން ހުންނަ އެންމެ ޝައުގުވެރި ކަމަކީ މިއީއެވެ. އޭނާ ބުނިގޮތުން އެކަން އޭރު ކޮށް އުޅުނީ އޭރަކީ ކޮންމެ ކޮންމެ ގެއެއްގައި ރެފްރިޖިރޭޓަރު ހުންނަ ދުވަސް ވަރަކަށް ނުވާތީ ރޯދަވީއްލަން އާއްމުކޮށް ސުފުރާމަތީ ބޭނުންކުރާ "ކުރުބާ ފަނި" ފިނިކުރުމަށެވެ.
ބުނެވޭގޮތުގައި ވަޅަށް ލާފައި ބެހެއްޓުމުން ނަގާއިރު ހުންނަނީ ކުރުބާ ފިނިވެފައެވެ. އެ ކުރުބާ ހެނދުނު ހެނދުނާއި ނުވަތަ ބައެއް ރަށްރަށުގައި ހާރުދަމަށް ކާން ނިކުމެފައިވެސް، ވަޅަށް ބާލާ އުޅެއެވެ. އެ ކުރުބާ ނަގަނީ ސުފުރާ މައްޗަށް އަރުވާ އެންމެ ފަހު ބުއިމެއްގެ ގޮތުން، ބަންގި ގޮވަން ކައިރި ވީމައެވެ. ބައެއް މީހުން އެއްކުރުބާ ނެގުމަށްފަހު އޭގެ އަނެއްދުވަހަށް ފިނިކުރަން ބޭނުންވާނަމަ އިތުރު ކުރުބާތަކެއް ވަޅަށް ތިރިކުރެއެވެ.
ނަމަވެސް މިއީ ހަމަ ކުރުބަލެއް ވަޅަށް ލާފައި ބެހެއްޓުމަށްފަހު ނަގަނީއެއް ނޫނެވެ. މިއީ އަދި ތަފާތު ގޮތަކަށް ކުރާ ކަމެކެވެ. އޭނާ ކިޔައިދިން ގޮތުން ފުރަތަމަ ކުރުބާގެ ބޮބިގަނޑު ނަގާ، ވަޅިން ރީތިކޮށް ނާށިގަނޑު އޮމާން ކުރަނީއެވެ.
އެއްކޮށް އޮމާންވުމުން އެއަށްފަހު ފަންވަތަކުން ހަދާފައި އިންނަ ގޮނަ(ކުރުބާ އާއި އެއް ސައިޒަކަށް ފަންވަތުން ވިޔެގެން ހަދާ އެއްޗެއް) ކުރުބާލާފައި ވަޅުގެ ތެރެއަށް ލަނީ އެވެ. އެރަށުގައި ގިނަ ގޭގޭގައި މިކަން އޭރު ކުރަނީ މެންދުރެއްހާއިރު އެވެ.
މިއީ އޭރު ފިނިކުރެވޭނެ ގޮތެއް ނެތް އިރު ގިނަ ރަށްރަށުގައި ކޮށްއުޅުނު ކަމެކެވެ.
