ސަރުކާރުގެ ބޯހިޔާވަހިކަމުގެ މަޝްރޫއުތަކާ ގުޅޭ ގޮތުން މިދިޔަ އަންގާރަ ދުވަހު، ގައުމީ ތަރައްގީ އާއި ތަރިކައިގެ ކޮމިޓީއަށް ހައުސިން މިނިސްޓްރީން ހާޒިރުކޮށް ކުރިމަތި ކުރެއްވި ސުވާލުތަކުގެ ތެރެއިން މިދައުރު ނިމޭއިރު، ކިހާބަޔަކަށް ބޯހިޔާވަހިކަން ފޯރުކޮށްދެެވޭނެތޯ ކުރެވުނު ސުވާލަށް ޖަވާބު ދެއްވަމުން އަކްރަމް ވިދާޅުވީ، ގޯތި ދެއްވަން ރައީސް އިބްރާހިމް މުހައްމަދު ސޯލިހު ވައުދުވިފަދައިން އެކަން ކުރާނެ ކަމަށާއި، މާލޭ ރަށްވެހިންނަށް ދޭން ވައުދުވެވަޑައިގެންނެވި، ގޯތި ތަކަށް ކުރިމަތިލުމުގެ ފުރުސަތު ޖޫން މަހުގެ ތެރޭގައި ހުޅުވާލާނެ ކަމަށް ބެލެވޭ ކަމަށެވެ.
މިއަހަރުގެ ރިޔާސީ ބަޔާނުގައި ރައީސް އިބްރާހިމް މުހައްމަދު ސޯލިހު ވަނީ، ހުޅުމާލެ ދެވަނަ ފިޔަވަހީން މާލޭ ރައްޔިތުންނަށް ބިން ދޫކުރާނެ ކަމަށް ވިދާޅުވެފައެވެ.
އެންމެ ފަހުން އެޗްޑީސީގެ މެނޭޖިން ޑިރެކްޓަރު ސުހައިލް އަހުމަދު ހާމަކުރެއްވި މައުލޫމާތައް ބަލާއިރު، އެކަމަށް ހައުސިން މިނިސްޓްރީގެ ފަރާތުން އެޗްޑީސީގައި ވަނީ އެދިފައެވެ. އަދި ވެށިފަހި ޕްރޮގްރާމްގެ ދަށުން 2008 ގައި ދޫކުރި 1،250 އަކަފޫޓުގެ ބޮޑުމިން ހުންނަ ވަރުގެ ބިން ދެވަނަ ފިޔަވަހީން މާލެ ރައްޔިތުންނަށް ދޫކުރާނެއެވެ.
މާލޭ ރަށްވެހިންނަށް ގޯތި ދޭން ނިންމާފައިވާ ގޮތް
- ހުޅުމާލެއިން 1،250 އަކަފޫޓުގެ 1،000 ގޯތި
- ގުޅީފަޅުން 2،000 ގޯތި
- ގިރާވަޅު ފަޅު ހިއްކައިގެން 2،000 ގޯތި
