މި މައްސަލަ އާއި ގުޅިގެން ދައުލަތުން ވަނީ އޭނާގެ މައްޗަށް އެނގިހުރެ ސައްހަ ނޫން ލިޔުމެއް ތެދުކަމަށް ދެއްކުމަށް މަސައްކަތް ކުރި ދައުވާ އުފުލާފައެވެ. މި މައްސަލައާއި ގުޅިގެން ކޯޓުން ބޭއްވި އިބްތިދާއީ އަޑުއެހުމުގައި އޭނާ ވަނީ އެ މައްސަލަ އަށް އިއުތިރާފްވެ އަވަސްނިޔާގެ ޝަރީއަތެއްގެ ގޮތުގައި މި މައްސަލަ ކުރިއަށް ގެންދިއުމަށް އެދިފައެވެ.
އޭނަ ވަނީ އައިފޯނުގެ އަގު ކަމަށްވާ 13،550 ރުފިޔާ ފޮނުވިކަމަށް ދެއްކުމަށް ވަގު ސްލިޕެއް ފިހާރައަށް ފޮނުވާފައެވެ. އޭނާ ވަނީ މާޗް މަހުގެ 17 ވަނަ ދުވަހު ފޯނު ވިއްކި ފިހާރައިން ފޯނު ޑެލިވާ ކުރުމުން އެ ފިހާރައިގެ ވައިބާ ނަންބަރަށް ސައްހަ ނޫން ޓްރާންސްފާ ސްލިޕެއް ފޮނުވާފައެވެ.
މި މައްސަލަ އާއި ގުޅިގެން އޭނާ ކުށަށް އިއުތިރާފް ވުމުން ކޯޓުން ވަނީ އޭނާ ތިން މަހާއި 18 ދުވަހުގެ މުއްދަތަކަށް ޖަލަށް ލުމަށް ހުކުމް ކޮށްފައެވެ.
ފަހަކަށް އައިސް ރާއްޖޭގައި ވަގު ސްލިޕް ފޮނުވައިގެން މަކަރާއި ހީލަތުގެ ބޮޑެތި ޖަރީމާތައް އަންނަނީ ހިންގަމުންނެވެ. އަދި މިކަމުގެ ސަބަބުން ބައެއް ވިޔަފާރިތަކަށް ބޮޑެތި ގެއްލުންތަކެއް ވަނީ ލިބިފައެވެ.
