އާދިއްތަ ދުވަހު ހަވީރު ކުޅުނު މެޗުން ދިވެހި ޓީމު ބަލިވުމާއެކު އެއްބަޔަކު އަވަސްވެގަތީ ސޯޝަލް މީޑިއާގައި ދިވެހި ޓީމަށް ފުރައްސާރަ ކުރާށެވެ. އެކަމަކު ދިވެހި ޓީމަށް ހިއްވަރު ދީ ސަޕޯޓް ކުރި މީހުންވެސް މަދެއް ނޫނެވެ.
ހަގީގަތުގައި ދިވެހި ޓީމުން އޭޝިއާގެ ޗެމްޕިއަން އަތުން ބަލިވުމަކީ މައްސަލައެއް ނޫނެވެ. ސަތާރަ ލަނޑު ވީމާ އެއީ ގިނަ އަދަދެކެވެ. އެކަމަކު ގަބޫލު ކުރަން ޖެހޭ ހަގީގަތަކީ ދިވެހިރާއްޖޭގައި ފުޓްސަލް މުބާރާތްތަކުގައި އަސްލު ހަގީގަތުގައި ކުޅޭ ކަހަލަ އެންމެ ދަނޑެއްވެސް ނެތް ކަމެވެ. ދިވެހި ޓީމު މުބާރާތަށް ދިޔައީ މާލޭގައި ގަނަ ތެޅުމަށް ފަހު ކަން އެއީ ފެންނަން އޮތް ހަގީގަތެވެ.
މިއަދު ދިވެހި ޓީމު ކުޅޭނީ ކިރްގިސްތާނާ ދެކޮޅަށެވެ. މިއަދުގެ މެޗު އޮންނާނީ ރޭގަނޑު ހަތެއް ޖަހާއިރުއެވެ. އަދި ކޮލިފައިން ގްރޫޕުގެ ފަހު މެޗުގައި އަންގާރަ ދުވަހު ރާއްޖެ ނުކުންނާނީ ތުރުކުމަނިސްތާނާ ދެކޮޅަށެވެ. މި މެޗު އޮންނާނީ ހަވީރުއެވެ. މި މެޗުތައް ކުޅޭނީ ކިރްގިސްތާނުގައެވެ.
ރާއްޖޭގެ ޓީމު މި މެޗުތައް ކުޅުމަށް މިދިޔަ ހަފްތާގައި ކިރިގިސްތާނަށް ގޮސްފައިވާއިރު، ދިވެހި ޓީމު ދިޔައީ މާލޭގައި އެތައް އުނދަގޫތަކެއް ތަހައްމަލު ކުރުމަށް ފަހުއެވެ. ދިވެހި ޓީމަށް ޕްރެކްޓިސް ކުރެވޭނެ ގޮތެއް ނެތިގެން އުޅެން ޖެހުނެވެ. މުބާރާތް ކުޅޭނީ އިންޑޯރ ކޯޓެއްގައި ނަމަވެސް ރާއްޖޭގައި އިންޑޯ ކޯޓެއް ނުވެސް ނެތެވެ. އިންޑޯ ކޯޓެއް ނެތްތާ ޓަރފު ދަނޑެއްގައިވެސް ޕްރެކްޓިސް ކުރުމަށް ގައުމީ ޓީމަށް އެކި ކަހަލަ ގޮން ޖެހުންތައް ކުރިމަތިވެފައިވެއެވެ. ދަނޑު ނުލިބުމާއި، ލިބޭ ދަނޑުތަކުގެ ސައިޒް ދިމާނުވުމާއި ދަނޑުތައް ހަލާކުވެފައި ހުރުމާއި މި ފަދަ އެތައް އުނދަގުލެއް ގައުމީ ފުޓްސަލް ޓީމުން ތަހައްމަލު ކުރިއެވެ.
