ރަހިމުގެ ގުޅުމަކީ ކިތަންމެ މާތް ގުޅުމެއް ނަމަވެސް, ކޮއްކޯފުޅު ކުރީގެ ރައީސް ޔާމިން އަބްދުލްގައްޔޫމް ނުބެހެއްޓެވި ގާތްކަމެއް ބަހައްޓަވާނީ ކިހިނަކުންތޯ ވިދާޅުވެ ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމް ސުވާލު ކުރައްވައިފިއެވެ.
ކުރީގެ ރައީސް ޔާމިނާއެކު ސިޔާސީ މަސައްކަތް ދެން ކުރައްވާނަންތޯ ''ސީއެންއެމް'' އިން ސުވާލުކުރުމުން ރައީސް މައުމޫން ވިދާޅުވީ ''މުސްތަގުބަލުގަ ވާނެ ނުވާނެ ބުނާކަށް ނޭނގޭނެ'' ކަމަށާއި, ޔާމިނާއި ގުޅިގެން ސިޔާސީ މަސައްކަތެއް ކުރައްވާކަށް ''ހިތަކު ނެތް'' ކަމަށެވެ. އެހެން ވިދާޅުވުމަށްފަހު ރައީސް މައުމޫން ވަނީ ރައީސް ޔާމިނުގެ ވެރިކަމުގައި އެ މަނިކުފާނު ޖަލަށްލެއްވިކަމުގެ ހިތި ހަނދާންތައް އާކުރައްވާފައެވެ.
''އަޅުގަނޑު ހިތަކު ނެތް އެއްވެސް ވަރަކަށް ޔާމިނާ ގުޅިގެން ސިޔާސީ މަސައްކަތެއް ކުރާނަމެކޭ. އަޅުގަނޑަށް ވަރަށް ބޮޑެތި އަނިޔާދީފަ ހުރި މީހެއް އެއީ. އަޅުގަނޑުގެ އެއްވެސް ކުށަކާ ނުލާ ވަރަށް ބޮޑެތި އަނިޔާދީފަ ހުރީ. އަޅުގަނޑުގެ ކޮއްކޮއަކަށްވިޔަސް އޭނައާއެކު ސިޔާސީ މަސައްކަތެއްގަ ނޫޅެވޭނެ އިނގޭތޯ.'' ރައީސް މައުމޫން ވިދާޅުވިއެވެ.
ރައީސް ޔާމިނަށް މާފު ދެއްވަން ޖެހޭނެ ނޫންތޯއާއި, ރަހިމުގެ ގުޅުން ދަމަހައްޓަން ޖެހޭނެ ނޫންތޯ ސުވާލު ދެންނެވުމުން ރައީސް މައުމޫން ވިދާޅުވީ ރަހިމުގެ ގުޅުން ކިތަންމެ މުހިންމު ވިޔަސް ޔާމިން ވަނީ އެ މަނިކުފާނު ޖަލަށްލައްވައި އެތަކެއް އަނިޔާތަކެއް ދެއްވާފައި ކަމަށެވެ.
''އަޅުގަނޑު އެކަންޏެއް ނޫން. އަޅުގަނޑުގެ ކުދިން ފާރިޝް ވެސް ހައްޔަރު ކުރި. ނަދީމް ވެސް ހައްޔަރު ކުރި. ދެން މިހެން ގޮސް ބައިވަރު ކަންތައް ކޮށްފަހުރީ. އެހެންވީމަ ރަހިމުގެ ގުޅުމަކީ ކިތަންމެ މާތް ގުޅުމަކަށްވިޔަސް އެއްކޮޅުން އެ ގުޅުން ނުބަހައްޓަންޏާ ކިހިނެއްތޯ ބަހައްޓާނީ.'' ރައީސް މައުމޫން ވިދާޅުވިއެވެ.
އެފަދަ އަނިޔާތަކެއް ދެއްވާފައި ރައީސް ޔާމިން މާފަށް އެދިވަޑައިގެންނެވިތޯ ސުވާލު ކުރުމުން ވިދާޅުވީ ''ނޫން އެއްގޮތަކަށް ވެސް ނޭދޭ'' ކަމަށެވެ.
