ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު ނަސީމް ހާޒިރުކުރެއްވީ ތިމަރަފުށި ދާއިރާގެ މެންބަރު އަބްދުالله ރިޔާޒް، އެމަނިކުފާނާއި ކުރައްވާ ސުވާލަށް ޖަވާބު އެރުވުމަށެވެ.
އެއަށްފަހު އެހެން މެމްބަރުންނަށް ސުވާލު ކުރެއްވުމަށް ހުޅުވާލި ފުރުސަތުގައި، ކާށިދޫ ދާއިރާގެ މެމްބަރު އަދި ދިވެހި ރައްޔިތުންގެ ޕާޓީ (ޑީއާރުޕީ) ގެ ލީޑަރު އަބްދުﷲ ޖާބިރު ވަނީ އާސަންދައިން ބަޔަކު މީހުން ވައްކަން ކުރަމުން އަންނަ ކަމަށާއި، އެކަން އެގޮތަށް ހިނގާއިރު، ހެލްތު މިނިސްޓްރީން ކުރީ ކޮންކަމެއްތޯ ސުވާލުކުރައްވާފައެވެ.
ޖާބިރު ކުރެއްވި ސުވާލަށް ޖަވާބުދެއްވަމުން މިނިސްޓަރު ވިދާޅުވީ، އާސަންދަ ނިޒާމުގެ ތެރެއިން ވައްކަން ކުރުމުގެ ކަންކަން ހިނގާކަން ފާހަގަ ކުރެވޭ ކަމަށާއި، އެ ނިޒާމުގައި ގިނަ މައްސަލަތަކެއް ހުރިކަން ފާހަގަ ކުރެވޭ ކަމަށެވެ. އަދި އާސަންދަ އިސްލާހު ކުރަން ޖެހޭކަން ގަބޫލުފުޅު ކުރައްވާކަމަށްވެސް މިނިސްޓަރު ވަނީ ވިދާޅުވެފައެވެ.
މީގެ އިތުރުން މިނިސްޓަރު ވިދާޅުވީ، އާސަންދައިގެ ކަންކަން ތަރުތީބު ކުރެވިފައިހުރި ގޮތުން އެކަންކަން އިސްލާހު ކުރަން ޖެހޭ ކަމަށާއި، އެކަންކަން ކުރަމުން އަންނަ ކަމަށެވެ. އަދި އެއްވެސް ވަރަކަށް ވައްކަމަކަށް ތާއީދު ނުކުރައްވާނެ ކަމަށްވެސް މިނިސްޓަރު ވަނީ ވިދާޅުވެފައެވެ.
