މިފަދަ ތުހުމަތެއް ކުރެއްވީ ގަލޮޅު އުތުރު ދާއިރާގެ މެންބަރު އީވާ އަބްދު الله ހުށަހަޅުއްވާ ފައިވާ، އަންހެން ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރި ކޮމިޓީތަކުގެ މެންބަރުންގެ މަސްއޫލިއްޔަތު އަދާ ކުރުމުގައި ދިމާވާ ދަތިތަކަށް ހައްލެއް ގެނައުމަށް ގޮވާލައި ހުށަހަޅި ޤަރާރުގެ ބަހުސްގައި ވާހަކަ ދައްކަަވަމުން އިދިކޮޅު ޕީއެންސީގެ ނައިބު ރައީސް، މަޑުއްވަރީ ދާއިރާގެ މެންބަރު އާދަމް ޝަރީފު އެވެ.
ފުރަތަމަ އެކަން ފާހަގަކުރައްވާ އީވާގެ ދިފާއުގައި ވާހަކަ ދެއްކެވީ ވެސް މެމްބަރު އާދަމް ޝަރީފް އެވެ. މިއަދުގެ ޖަލްސާގައި ވާހަކަ ދައްކަވަމުން މެމްބަރު ޝަރީފް ވިދާޅުވީ، މަޖިލީހަށް އެމައްސަލަ ހުށަހެޅުމުން އެ ބަހުސްގައި ވާހަކަ ދެއްކެވި ބައެއް މެމްބަރުން ވާހަކަ ދައްކަވާއިރު، ގަބޫލު ކުރަނީ އީވާ ވާހަކަ ދައްކަވަނީ އިއްޔެ ކުރެއްވި ކެމްޕެއިން ދަތުރެއްގެ ތެރެއިން ފެނުނު މަންޒަރުތަކެއްގެ ވާހަކައެއް ކަމަށެވެ.
އެއީ އެކަން އޮތްގޮތް ނޫންކަމަށާއި، ގަބޫލު ކުރަންވީ ހަގީގަތަކީ އީވާ ވާކާލާތު ކުރައްވަނީ ރާއްޖޭގައި ހުރި މައްސަލަތަކުގެ ތެރެއިން އީވާއަށް ފާހަގަކުރެއްވޭ އެންމެ ބޮޑު އެއް މައްސަލަ ނަންގަވައިގެން ކަން ކަމަށް ޝަރީފް ވިދާޅުވިއެވެ. އަދި މަޖިލިސް ތެރޭ ބުލީކޮށް ޖެއްސުން ކުރުން ހުއްޓާލަން ޖެހޭކަމަށް ޝަރީފް ވިދާޅުވިއެވެ.
މި ބަހުސްގައި ހުރިހާ މެމްބަރުން ވާހަކަަ ދައްކާ ނިމުމުން އެންމެ ފަހުބަސް ވިދާޅުވާން އީވާއަށް ދެއްވި ފުރުސަތުގައި ޝަރީފުގެ ވާހަކަތައް ފާހަގަކުރައްވަމުން އީވާ ވިދާޅުވީ، މިހާރު ރައްޔިތުންގެ މަޖިލީހުގެ ތެރެއިން ބުލީވާކަށް ދެން ނެތިން ކަމަށެވެ.
އީީވާ އިތުރަށް ވިދާޅުވީ، އުމުރުން 44 އަހަރުވީއިރު، ސިޔާސީ މަސައްކަތުގައި އުޅޭތާ 20 އަހަރުވެގެންދާއިރު އެހަމަލާތަކަށް އެޔަކަށް ބޯލަބާކަށް އަދި ފަހަތަށް ވެސް ނުޖެހޭނެ ކަމަށެވެ. އެކަން އެގޮތަށް ވާތީ އުނދަގޫ ވާ ކަމަށާއި ނަމަވެސް ހުންނެވީ އުނދަގޫވާ ކޮންމެ ފަހަރަކު ފަހަތަށް ޖެހޭ ގޮތަށް ނޫން ކަމަށް އީވާ ވިދާޅުވިއެވެ.
އެމައްސަލަ ލުމުން ވެސް ވަރަށް ގިނަ ވާހަކަތަކެއް އަނެއްކާވެސް އެކަމަަނާއަަށް އަޑުއިވިގެން ހިނގައްޖެކަން ފާހަގަ ކުރައްވަމުން އިވާ ވިދާޅުވީ، މި ގާރާރު ހުށަހެޅުމުން ވެސް އެތައް ބައިވަރު ޑަބްލިޔުޑީސީގެ މެމްބަރުން އަނެއްކާ ވެސް އެމީހުންނަށް ދުއްތުރާތަކެއް ދިމާވަމުންދާކަމަށް ބުނެ ކަންބޮޑުވުން ފާޅުކުރަމުން އަންނަ ކަމަށެވެ.
އީވާ ވިދާޅުވީ، ކައުންސިލުތަކުގައި ތިބި ޑަބްލިޔުޑީސީ މެމްބަރުންނަކީ އެރަށްރަށުގެ ލީޑަރުން ކަމަށެވެ. މިއަދު އަންހެން ކައުންސިލަރުންތަކެއް ރަށްރަށަށް އިންތިހާބުކޮށް ފުރުއްސާރަކޮށް ޖެއްސުން، ކުޑަކޮށް، އޮއްބާލަން މަސައްކަތް ކުރާ ނަމަ އެއީ އަންނަން އޮތް ޖީލުތަކުގެ އަންހެން ދަރިންނަށްދެވޭ ވަރަށް ގޯސް މެސެޖެއް ކަމަށެެވެ.
