މާލޭ ސިޓީ ކައުންސިލުން ކޮށްފައިވާ އިއުލާނެއްގައި ބުނެފައިވަނީ، ބުރިޖުގެ މަސައްކަތް ކުރުމަށް ހާއްސަކުރެވިފައިވާ ސަރަހައްދުގައި ފެންސު ޖެހުމުގެ މަސައްކަތް ފެށިގެން ކުރިއަށްދާ ކަމަށާއި، އެހެން ކަމުން ވިލިމާލޭގެ ދެކުނު ފަރާތުގެ އެއްގައުމުގައި ހުރި އުޅަނދު ތަކާއި، ފަޅުގައި ހުރި އުޅަނދުތައް އެ ސަރަހައްދުން ނެގުމަށް ވަނީ އަންގާފައެވެ.
މީގެ އިތުރުން ކައުންސިލުން ބުނީ، މިއަންނަ އަންގާރަ ދުވަހުގެ އިރުއޮއްސި 18:00 ގެ ކުރިން އެ ސަރަހައްދުން އެ އުޅަނދުފަހަރު ނެގުމަށް އިލްތިމާސް ކުރާ ކަމަށާއި، އޭގެ ފަހުން އެ ސަރަހައްދުގައި އުޅަނދުތައް ހުރެއްޖެނަމަ އެ އުޅަނދުތައް ބެހެއްޓުމަށް ހަމަޖެހިފައިވާ ސަރަހައްދަށް ބަދަލު ކުރާނެ ކަމަށެވެ.
އަދި މިގޮތަށް އުޅަނދުތައް ބަދަލުކު ކުރާއިރު، އުޅަނދުތަކަށް ލިބިދާނެ ގެއްލުމަކަށް އެކައުންސިލުން ޒިންމާ ނުވާނެ ކަމަށްވެސް ކައުންސިލުން ކޮށްފައިވާ އިއުލާނުގައި ވަނީ ބުނެފައެވެ.
ތިލަމާލެ ބުރިޖަކީ ޖުމުލަ 500 މިލިއަން ޑޮލަރު (7.7 ބިލިއަން ރުފިޔާ)ގެ މަޝްރޫއެކެވެ. އެ މަޝްރޫއަށް ބޭނުންވާ މާލީ އެހީ ހަމަޖައްސާފައި ވަނީ އިންޑިއާގެ ހިލޭ އެހީގެ ދަށުންނާއި އެ ގައުމުގެ އެގްޒިމް ބޭންކުގެ ލައިން އޮފް ކްރެޑިޓުގެ ދަށުންނެވެ.
