ނަބީހު އެނބުރި ރާއްޖެ އައުމާއި އެކު އޭނާއަށް މަރުހަބާ ދެންނެވީ، އިސްލާމިކް މިނިސްޓަރު ޑރ. އަހުމަދު ޒާހިރު އަލީއާއި، އިސްލާމިކް މިނިސްޓްރީގެ ސްޓޭޓް މިނިސްޓަރު އިލްޔާސް ޖަމާލްއާއި، މިނިސްޓްރީގެ ޕާމަނަންޓް ސެކްރެޓަރީ އަހުމަދު އަދީލާއި މިނިސްޓްރީގެ އިސް ބޭފުޅުންނެވެ.
ނަބީހުގެ މަންމަ ވަނީ ސަރުކާރުން ނަބީހަށް ދެއްވި މި ފުރުސަތަށް ޝުކުރުއަދާކޮށް، ދުބާއީގައި ހޭދަވި 17 ދުވަހު، އެއްވެސްކަހަލަ ދަތިކަމެއް ނެތި އެގުއުމުގައި ދުވަސްތައް ހޭދަކުރެވުނީތީ އެކަމަށްޓަކައި ސަރުކާރަށް ޝުކުރު އަދާކު ރައްވާފައެވެ. އަދި ރައީސް ސޯލިހު އާއި ނައިބު ރައީސް ފައިސަލް ވަރަށް ގާތުން ނަބީހުގެ ހާލުބައްލަވައި، މުބާރާތުގެ ކަންކަން ހިނގަމުންދާގޮތް ބެއްލެވިކަމަށާއި އަދި މިނިސްޓަރާއި މިނިސްޓްރީގެ އިސްވެރިން ބެހެއްޓެވި ގާތްކަމާއި މިއަދު ވިދާޅުވި ހޫނު މަރުހަބާއަށްވެސް ވަނީ ޝުކުރުއަދާކޮށްފައެވެ.
ދުބާއީ އިންޓަނޭޝަނަލް ހޯލީ ގުރްއާން ކޮމްޕެޓިޝަން 2022 ގައި އޮންނަ އުސޫލުން ދަތުރުގެ ކަންތައް ހަމަޖައްސައިދެނީ ހަމައެކަނި ކިޔަވާ ދަރިވަރަށެވެ. އެހެންނަމަވެސް ނަބީހަކީ ހާއްސަ އެހީއަށް ބޭނުންވާ ދަރިވަރަކަށްވާތީ ނަބީހުގެ މަންމައާއި ދައްތައަށް މި މުބާރާތަށް ދުބާއީއަށް ދިޔުމާއި ހުރުމުގެ ކަންކަން ހަމަޖެއްސުމުގައި ސަރުކާރާއި ސަރުކާރު ހިއްސާވާ ގިނަ ކުންފުނިތަކާއި މީގެ އިތުރުން ގިނަ ފަރާތްތަކެއްގެ އެހީތެރިކަން ވަނީ ލިބިފައެވެ.
