"ސީއެންއެމް" އަށް މައުލޫމާތު ދިން ފަރާތަކުން ބުނީ، މިއަދު އިރުއޮސެނިކޮށް އެ ދެމީހުން ދޭތެރޭ ހިނގި ހަމަނުޖެހުމެއްގައި ޕާކިސްތާނު މީހާ ވަނީ ބަންގްލަދޭޝް މީހާއަށް ވަޅިން ހަމަލާދީފައި ކަމަށެވެ. އެ ޕާކިސްތާނު މީހާ އަކީ އެ ރެސްޓޯރަންޓުގެ ކައްކާ ކަމަށާއި، ބަންގްލަދޭޝް މީހާއަކީ ވެއިޓަރެއް ކަމަށްވެސް އެފަރާތުން ވަނީ ބުނެފައެވެ.
"ސީއެންއެމް" އަށް ލިބިފައިވާ ވީޑިއޯއިން ފެންނަ ގޮތުގައި، ބަންގްލަދޭޝް މީހާގެ ހަށުގަނޑުގެ އެކިތަންތަނަށް ވަނީ ވަޅިން ހަމަލާދީފައެވެ. އެގޮތުން އޭނާގެ ކަރަށާއި، ބަނޑަށް ވަޅިހަރާފައި ހުރި މަންޒަރު ވީޑިއޯއިން ފެނެއެވެ. އަދި އެ ބަންގްލަދޭޝް މީހާ ވެއްޓިފައި އޮތްވާ އެމީހާއަށް ސީޕީއާރު ދޭ މަންޒަރުވެސް ވީޑިއޯއިން ފެނެއެވެ.
ބަންގްލަދޭޝް މީހާއަށް ހަމަލާދީ މަރާލުމަށްފަހު އެ ޕާކިސްތާނު މީހާ އެތަނުން ފިލާފައި ވާކަމަށް "ސީއެންއެމް" އާއި ވާހަކަ ދެއްކި ފަރާތުން ވަނީ ބުނެފައެވެ. އަދި މިހާރުވެސް އެ ސަރަހައްދުގައި ފުލުހުން ހަރަކާތްތެރި ވަމުން އަންނަ ކަމަށްވެސް އެފަރާތުން ވަނީ ބުނެފައެވެ.
މިކަމާއި ގުޅިގެން ފުލުހުން ބުނީ، މިމައްސަލަ އާއި ގުޅިގެން އުމުރުން 26 އަހަރުގެ މުހައްމަދު އާބިދް ނަމަކަށް ކިޔާ ޕާކިސްތާނަށް ނިސްބަތްވާ މީހެއް ހޯދަމުން އަންނަ ކަމަށެވެ.
އަދި އެމީހާ އަކީ ވަރަށް ނުރައްކާތެރި މީހެއް ކަމަށާއި، އެމީހާ ފެނިއްޖެނަމަ ލަސްނުކޮށް ފުލުހުންނަށް އެންގުމަށް އެދޭ ކަމަށެވެ. އަދި އާއްމުން އެމީހާއާއި އެއްވެސް ވަރަކަށް ކުރިމަތި ނުލުމަށްވެސް ފުލުހުން ވަނީ އިލްތިމާސްކޮށްފަ އެވެ.
