Advertisement

ސޯޝަލް މީޑިއާ އެކި ޕްލެޓްފޯމްތަކުގައި، އެކި އެކައުންޓްތަކުން ޓެރަރިސްޓް ޖަމާއަތެއްކަމަށްވާ އައިއެސް ޖަމާއަތައް ތާއީދުކޮށް، އެ ޖަމާއަތުގެ ލިޔެކިއުންތަކާއި ފޮޓޯއާއި ވީޑިއޯ އިންޓަނެޓް މެދުވެރިކޮށް ފަތުރައި ޝާއިއުކޮށް، ޓެރަރިޒަމްގެ އަމަލެއް ރާވައި ހިންގައިފާނެކަމުގެ އިންޒާރުދެމުންދާކަމަށް ތުހުމަތު ކުރެވުނު މައްސަލައިގައި، އޭނާގެ މައްޗަށް ފަސް ދައުވާއެއް ކުރުމަށް އިއްޔެ ވަނީ ކްރިމިނަލް ކޯޓަށް ހުށަހަޅާފައެވެ.

ހޫދުގެ މައްޗަށް ކޮށްފައިވާ ދައުވާތަކުގެ ތަފުސީލު:

1. އިންޓަނެޓް މެދުވެރިކޮށް ޓެރަރިޒަމްގެ އަމަލެއް ކުރުމަށް ހިތްވަރުދިނުމުގެ ކުށުގެ ދައުވާ

• ސަބަބު: ހޫދުގެ ފޯނުން ސޯޝަލް މީޑިއާގެ އެކި އެކައުންޓުތައް ބޭނުންކޮށްގެން ޓެރަރިޒަމްގެ އަމަލުތަކަށް ހިތްވަރުދީ، މީހުންނަށް އަނިޔާދިނުމަށާއި މީހުން މެރުމަށާއި ތަންތަނަށް ގެއްލުންދީ އުދުވާނީ ހަމަލާތައް ދިނުމަށް ގޮވާލައި، އައިއެސް ޖަމާއަތުން ދުނިޔޭގައި ހިންގާ ލާއިންސާނީ އަމަލުތަކާއި ހަމަލާތަކާއި އެމީހުންގެ ޕްރޮޕެގެންޑާ ފެތުރުމަށް އެކި އެކި ބަސްބަހުން ތައްޔާރުކޮށްފައިވާ ގިނަ ލިޔުންތަކާއި ފޮޓޯތަކާއި ވީޑިއޯ އިސްލާމިކް ސްޓޭޓް ޖަމާއަތާ ގުޅުންހުރި އޮންލައިން ޕްލެޓްފޯމްތަކުގައި ހިއްސާކޮށް، ޓެރަރިޒަމްގެ އަމަލެއް ކުރުމަށް ހިތްވަރުދީފައިވާތީ
• އަދަބު: 10 އަހަރާއި 15 އަހަރާ ދެމެދުގެ ޖަލު ހުކުމެއް

2. އިންޓަނެޓް މެދުވެރިކޮށް ޓެރަރިސްޓް ޖަމާއަތެއްގެ ލިޔެކިޔުންތައް ފެތުރުން

• ސަބަބު: އައިއެސްއަށް ނިސްބަތްވާ އެކި މަޖައްލާތަކާއި ލިޔުންތަކާއި ޓެރަރިޒަމްގެ އަމަލުތައް ކުރުމަށް ހިތްވަރުދީ އެ ޖަމާއަތުން ނެރެފައިވާ ފަތުވާތަކާއި ލިޔުންތައް އިންޓަނެޓްގެ އެކި ޕްލެޓްފޯމްތަކުގައި ފަތުރާފައިވާތީ
• އަދަބު: 10 އަހަރާއި 15 އަހަރާ ދެމެދު

3. ޓެރަރިސްޓް ޖަމާއަތެއްގެ މެންބަރަކަށްވުން

• ސަބަބު: ހޫދު އައިއެސްގެ ހަބަރު ފަތުރާ މީޑިއާ އޮޕަރޭޓްކުރާ މެންބަރެއްގެ ހައިސިއްޔަތުން މަސައްކަތްކޮށްފައިވާތީ.
• އަދަބު: 10 އަހަރާއި 15 އަހަރާ ދެމެދު

4. ޓެރަރިސްޓް ޖަމާއަތަކަށް ތާއީދުކުރުން.

• ސަބަބު: ހޫދު، އައިއެސްއަށް ތާއީދުކޮށްފައިވާތީ
• އަދަބު: 03 އަހަރާއި 05 އަހަރާ ދެމެދު

5. ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުން

• ސަބަބު: އައިއެސްއާ އެ ޖަމާއަތުގެ އެކި ވިލާޔަތްތަކަށް ތާއީދުކުރާކަން ދޭހަވާ ފަދަ ލިޔުންތަކާއި ފޮޓޯއާއި ވީޑިއޯ ގެންގުޅެފައިވާތީ
• އަދަބު: 01 އަހަރާއި 03 އަހަރާ ދެމެދު

އޭނާ ވަނީ މި ހުރިހާ ދައުވާތަކަށްވެސް އިންކާރުކޮށްފައެވެ. އިއްޔެ އޭނާގެ ބަންދާއިމެދު ގޮތް ނިންމުމަށް ބޭއްވި ޝަރީއަތުގެ މަޖިލީހުގައި މައްސަލަ ބައްލަވާ ގާޒީ ވިދާޅުވީ، ތުހުމަތުތަކަށް ހޫދު އިންކާރު ކުރި ނަމަވެސް އެއަށް ބާރު ލިބިދޭ ވަރުގެ ހެކިތަކެއް ދައުލަތުން ހުށަހަޅާފައިވާ ކަމަށެވެ. އެހެންކަމުން ޝަރީއަތް ނިމެންދެން ހޫދު ބަންދު ކުރަން އަމުރު ކުރައްވާ ކަމަށެވެ.

ހޫދުއާ ގުޅޭ މައުލޫމާތު ރާއްޖެއާ ހިއްސާކޮށްފައިވަނީ ބޭރުގެ އިންޓެލިޖެންސް އޭޖެންސީތަކުން ނެވެ. އުމުރުން 30 އަހަރުގެ ހޫދު ހައްޔަރު ކޮށްފައިވަނީ މި ޖެނުއަރީ މަހުގެ ހަ ވަނަ ދުވަހުއެވެ.

އޭނާ ހައްޔަރުކޮށްފައިވަނީ ޔޫރަޕުގެ ދެ ގައުމެއްގެ އިދާރާއަކާއި އެމެރިކާގެ އެފްބީއައިއާ ގުޅިގެން ދިވެހި ފުލުހުން ރާއްޖޭގައި ހިންގި އޮޕަރޭޝަނެއްގައެވެ. ހޫދަކީ 2013 ވަނައަހަރު ޖޫންމަހު 14 އަހަރުގެ އަންހެން ކުއްޖަކު ރޭޕް ކޮށްގެން ހައްޔަރުކުރި ހަމީހުންގެ ތެރޭގައިވެސް ހިމެނޭ މީހެކެވެ. 

ފުލުހުން ކުރިން ބުނެފައިވާ ގޮތުން ހޫދަކީ 2015 އިން ފެށިގެން ޓެލެގްރާމާއި އެ ނޫންވެސް އެންކްރިޕްޓް ކޮށްފައިވާ މެސެޖިން ޕްލެޓްފޯމްތައް ބޭނުންކޮށްގެން އައިސިސްގެ ޕްރޮޕަގެންޑާ ފަތުރަމުން ދިޔަ މީހެކެވެ.

އެގޮތުން ބޭރުގެ ގުރޫޕުތައް މެދުވެރިކޮށް ޓެރަރިޒަމްގެ އަމަލުތައް ރާވައި ހިންގުމަށް ގޮވާލައި އެކަމަށް ހިތްވަރުދީ ޓެރަރިޒަމްގެ އަމަލެއް ހިންގަފާނެ ކަމުގެ ބިރު ދައްކައި އިންޒާރުވެސް ދީފައިވެ އެވެ.

ފުލުހުން ބުނީ  ޔޫރަޕްގެ ބައެއް ގައުމުތަކުގެ އިސް ވެރިންނާއި އާންމުންގެ ފުރާނައަށް ނުރައްކާވާ ފަދަ ހަމަލާ ދިނުމަށް ގޮވާލައި, އެފަދަ ކަންކަން ކުރުމަށްވެސް ހިތްވަރު ދީފައިވާ ކަމަށެވެ.