ރަޝިއާ ސަރުކާރުގެ އޮފިޝަލުންނާއި އެ މީހުންގެ އާއިލާގެ މެމްބަރުންނާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ރައްދު ދެއްވަމުން މޮސްކޯއިން ވަނީ ފޭސްބުކްގެ ފައުންޑަރު މާކް ޒަކަބަރގް އާއި ނައިބު ރައީސް ކަމަލާ ހެރިސް ހިމެނޭ ގޮތަށް އެމެރިކާގެ 29 ރައްޔިތަކަށް ދަތިކުރުމުގެ ފިޔަވަޅު އަޅާފައެވެ. އަދި ވަކި މުއްދަތެއް ނެތް ގޮތަށް ރަޝިއާއަށް އެތެރެވުން ވެސް ވަނީ މަނާކޮށްފަ އެވެ.
ރަޝިޔާގެ ޚާރިޖީ ވުޒާރާއިން ބުރާސްފަތި ދުވަހު ބުނެފައިވަނީ، "ރަސޯފޯބިކް އެޖެންޑާ ބައްޓަންކުރާ އެގްޒެކެޓިވްސް، ވިޔަފާރިވެރިން، ތަޖުރިބާކާރުން އަދި ނޫސްވެރިން، އަދި ވަރަށް މަތީ ފަންތީގެ އޮފިޝަލުންގެ އަނބިން" ރަޝިޔާއަށް ވަނުން ވަނީ މަނާ ކޮށްފައެވެ. އެކަން އެގޮތަށް ކުރަނީ ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ރަޝިޔާގެ އޮފިޝަލުންނާއި، ސައިންޓިސްޓުންނާއި، ސަގާފީ އަދި ވިޔަފާރީގެ ޝަހުސިއްޔަތުންގެ އާއިލާތަކަށް އަސަރުކުރާތީ ކަމަށެވެ.
ޒަކަބާގްގެ އިތުރުން މޮސްކޯއިން ވަނީ ލިންކްޑްއިންގެ ސީއީއޯ ރަޔަން ރޮސްލަންސްކީގެ އިތުރުން އަސްކަރީ އިންޑަސްޓްރީގެ ބޮޑެތި ކުންފުނިތައް ކަމަށްވާ ނޯތްރޮޕް ގްރޫމްމަން، ޖެނެރަލް ޑައިނަމިކްސް، އެލް3 ހެރިސް ޓެކްނޮލޮޖީސް، ލެއިޑޯސް، ބޯޒް އެލެން ހެމިލްޓަން އަދި އެއިރޯޖެޓް ރޮކެޓްޑައިންގެ ރައީސުންނާއި ސީއީއޯއިން ވަނީ ބްލެކްލިސްޓް ކޮށްފައެވެ. އަދި ޝިޕްބިލްޑަރ ހަންޓިންޓަން އިންގަލްސް އިންޑަސްޓްރީޒް އާއި ޑްރޯން އުފައްދާ އޭރޯވިރޮންމެންޓް އަށް ވެސް ވަނީ ރަޝިޔާއަށް ވަނުން މަނާ ކޮށް ހުރަސް އަޅާފައެވެ. މިޝޭލް އިންސްޓިޓިއުޓް އޮފް އެއިރޯސްޕޭސް ސްޓަޑީޒްގެ ޑިރެކްޓަރާއި ބޭންކް އޮފް އެމެރިކާގެ ރައީސްވެސް ބްލެކްލިސްޓްގައި ހިމެނެއެވެ.
ރަޝިޔާގެ ޚާރިޖީ ވުޒާރާއިން ބުނީ ދަތިކުރުމުގެ އިތުރު އިޢުލާނުތައް ކައިރި މުސްތަޤްބަލެއްގައި އިޢުލާނުކުރެވޭނެކަމަށެވެ. ރަޝިޔާއިން ވަނީ މީގެ ކުރިންވެސް ގިނަ އަދަދެއްގެ އޮފިޝަލުންނަށް ދަތި ކުރުމުގެ ފިޔަވަޅު އަޅާފައެވެ.
