މި މައްސަލަ ނޫސްވެރިންގެ ސަމާލުކަމަށް އައީ މިދިޔަ އަހަރުގެ ޖޫންމަހު ޓީޗާސް އެސޯސިއޭޝަން އޮފް މޯލްޑިވްސް (ޓޭމް) އާއި މި މައްސަލަ ބެލުމުގައި ޝާމިލްވި ޕަބްލިކް އިންޓަރެސްޓް ލޯ ސެންޓަރުން ނެރުނު ބަޔާނާއި ގުޅިގެންނެވެ.
އެ ސުކޫލުގެ ޓީޗަރުންނަށް އެކި ކަހަލަ ފުރައްސާރަކުރުމާއި، ބައެއް މުދައްރިސުންނަށް ޖިންސީ ފުރައްސާރަކުރުމުގެ ތުހުމަތާ ގުޅިގެން، އެޑިއުކޭޝަން މިނިސްޓްރީ އާއި ކަމާބެހޭ ފަރާތްތަކަށް މައްސަލަހުށަހެޅުމާ ގުޅިގެން، އެ މިނިސްޓްރީ ހާއްސަ ކޮމިޓީއަކުން މި މައްސަލަތައް ބަލައި، ޖިންސީ ފުރައްސާރައިގެ އަމަލު އިއްޒުއްދީން ސްކޫލްގެ ޕްރިންސިޕަލް، އިސްމާއިލް ނަސީރު މައްޗަށް ސާބިތުވެފައިވާ ކަމަށް އެބަޔާނުގައި ވަނީ ބުނެފައެވެ.
އެ މައްސަލަ ސާބިތުވެފައި ވަނިކޮށް މިއަމަލު ހިންގި ފަރާތަށް އެއްވެސް ފިޔަވަޅުއެޅުމެއްނެތި، އެފަރާތުގެ އެދުމުގެ މަތިން، ޕްރޮމޯޝަނަކާއެކު އެހެން ސްކޫލްއަކަށް ބަދަލުކޮށްފައިވާތީ އެ ޖަމްއިއްޔާއިން ވަނީ އެކަން ކުއްވެރިކޮށްފައެވެ. މިއީ ތައުލީމީ ދާއިރާގެ ގަދަރުވެރި މަޤާމެއްގައި ހުރެ، އޭނާގެ ދަށުން ތިބި މުއައްޒަފުންނަށް ޖިންސީ ފުރައްސާރަ ކޮށްފައިވާކަން ސާބިތުވެފައިވާ ހިނދު، އަނިޔާދިން ފަރާތުގެ މަސްލަހަތު ހިމާޔަތްކުރުމަށް، އެޑިއުކޭޝަން މިނިސްޓްރީން މަސަކަތްކުރަމުންދާ ދިއުން ކަމަށް އެ ޖަމްއިއްޔާއިން ވަނީ ބުނެފައެވެ.
އަދި މިކަމާއި ގުޅިގެން ޖިންސީ ފުރައްސާރައިގެ ޝިކާރައަކަށްވި ޓީޗަރުން އެހެން ސުކޫލް ތަކަށް ބަދަލު ކުރީ އެ ޓީޗަރުންނާއި އެއްވެސް މަޝްވަރާއެއް ކުރުމެއްނެތި ކަމަށާއި، އެކަން ކުރީ ބޭއިންސާފުން ކަމަށްވެސް އެ ޖަމިއްޔާއިން ނެރުނު ބަޔާނުގައި ވަނީ ބުނެފައެވެ.
އެ ޖަމިއްޔާއިން ބަޔާން ނެރުމާއި ގުޅިގެން އެޑިއުކޭޝަން މިނިސްޓްރީން އޭރު ނެރުނު ބަޔާނުގައި ބުނެފައިވަނީ، އިއްޒުއްދީން ސްކޫލުގެ ހަތަރު ޓީޗަރަކު މާލޭގެ އެހެން ސްކޫލްތަކަށް ބަދަލުކުރުމަށް ނިންމާފައިވާކަން އެ ފަރާތްތަކަށް ބުދަ ދުވަހު އަންގާފައިވަނީ 2021 ވަނަ އަހަރުގެ ކުރީކޮޅުގައި އިއްޒުއްދީން ސްކޫލްގެ ހަތަރު ލީޑިން ޓީޗަރުން އެއްފަހަރާ އިސްތިއުފާ ދިނުމާ ގުޅިގެން ސްކޫލްގައި އުފެދުނު ނުތަނަވަސްކަން ހައްލުކުރުމަށް ޕްރޮފެޝަނަލް މިންގަނޑުތަކާ އެއްގޮތަށް ހިންގުނު ލީޑަރޝިޕް އެންޑް މެނޭޖްމަންޓް ރިވިއުއަށް ރިއާޔަތްކޮށް ކަމަށެވެ. އަދި ރިވިއުއިން ސްކޫލު ހިންގުމުގައާއި ދޭދޭގުޅުންތަކުގައި ދަރިވަރުންގެ ކިޔެވުމަށް އަސަރުކުރާނެ މައްސަލަތަކެއް ހުރިކަމަށް ފާހަގަވެފައިވާތީ އެ މައްސަލަތައް ހައްލުކުރުމަށް ކުރާނެ ކަންކަން ނިންމުމަށް އެކުލަވާލެވުނު ކޮމެޓީން، ދިމާވެފައިވާ މައްސަލަތައް ހައްލުކުރުމަށްޓަކައި ދިރާސީ އާ އަހަރު ފެށުމުގެ ކުރިން ސްކޫލުގެ ބައެއް މަގާމުތައް ބަދަލުކުރުމަށް ލަފާދެއްވާފައިވާ ކަމަށެވެ.
އިއްޒުއްދީން ސްކޫލުގެ ހަތަރު ޓީޗަރަކު މާލޭގެ އެހެން ސްކޫލްތަކަށް ބަދަލުކުރަން ނިންމި ނިންމުމާއި، އެ ސްކޫލުގައި ހިނގައިދިޔަ ޖިންސީ ފުރައްސާރައިގެ މައްސަލައާ ގުޅުމެއް ނެތްކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން ނެރެފައިވާ ނޫސްބަޔާނުގައި ބުނީ އިއްޒުއްދީން ސްކޫލުގެ ހަތަރު ޓީޗަރަކު މާލޭގެ އެހެން ސްކޫލްތަކަށް ބަދަލުކުރުމަށް ނިންމާފައިވާކަން އެ ފަރާތްތަކަށް ބުދަ ދުވަހު އަންގާފައިވަނީ 2021 ވަނަ އަހަރުގެ ކުރީކޮޅުގައި ޢިއްޒުއްދީން ސްކޫލްގެ ހަތަރު ލީޑިން ޓީޗަރުން އެއްފަހަރާ އިސްތިޢުފާ ދިނުމާ ގުޅިގެން ސްކޫލްގައި އުފެދުނު ނުތަނަވަސްކަން ހައްލުކުރުމަށް ޕްރޮފެޝަނަލް މިންގަނޑުތަކާ އެއްގޮތަށް ހިންގުނު ލީޑަރޝިޕް އެންޑް މެނޭޖްމަންޓް ރިވިއުއަށް ރިޢާޔަތްކޮށް ކަމަށެވެ. އަދި ރިވިއުއިން ސްކޫލު ހިންގުމުގައާއި ދޭދޭގުޅުންތަކުގައި ދަރިވަރުންގެ ކިޔެވުމަށް އަސަރުކުރާނެ މައްސަލަތަކެއް ހުރިކަމަށް ފާހަގަވެފައިވާތީ އެ މައްސަލަތައް ހައްލުކުރުމަށް ކުރާނެ ކަންކަން ނިންމުމަށް އެކުލަވާލެވުނު ކޮމެޓީން، ދިމާވެފައިވާ މައްސަލަތައް ހައްލުކުރުމަށްޓަކައި ދިރާސީ އާ އަހަރު ފެށުމުގެ ކުރިން ސްކޫލުގެ ބައެއް މަގާމުތައް ބަދަލުކުރުމަށް ލަފާދެއްވާފައިވާ ކަމަށެވެ.
އަދި މި ޓީޗަރުން ބަދަލުކުރުމަށް ނިންމި ނިންމުމާއި، އެ މިނިސްޓްރީއަށް ހުށަހެޅިފައިވާ ޖިންސީ ފުރައްސާރައިގެ އެއްވެސް މައްސަލައަކާ ގުޅުމެއް ނުވާކަމަށް އެޑިއުކޭޝަން މިނިސްޓްރީން އޭރު ނެރުނު ބަޔާނުގައި ވަނީ ބުނެފައެވެ.
އެހެން ނަމަވެސް އިއްޒުއްދީން ސުކޫލުން މާލޭގެ އެހެން ސުކޫލުތަކަށް ބަދަލުކުރި ހަތަރު ޓީޗަރުން ވަނީ އެ ޓީޗަރުން ބަދަލުކުރީ ޖިންސީ ގޯނާގެ މައްސަލައާއި ގުޅިގެން ކަމަށްބުނެ އެމައްސަލަ ވިސްލްބްލޯވާ ޕްރޮޓެކްޝަން ޔުނިޓަށް ހުށަހަޅައިފައެވެ.
އެކަމާއި ގުޅުގެން އެ ޔުނިޓުން ބަލަންޖެހޭ ކަންކަން ބެލުމަށްފަހު މިމަހުގެ 21 ވަނަ ދުވަހު ނިންމި ނިންމުމުގައި ބުނެފައިވަނީ، މި މައްސަލަ އާއި ގުޅިގެން އެޑިއުކޭޝަން މިނިސްޓްރީން ނިންމި ނިންމުމަކީ، ވިސްލްބްލޯކުރާ ފަރާތްތައް ރައްކާތެރިކުރުމުގެ ގާނޫނުގެ ދަށުން ވިސްލްބްލޯކުރުމުގެ ސަބަބުން ބަދަލުހިފުމުގެ ގޮތުން ނިންމައިފައިވާ ނިންމުމެއް ކަމަށް ކަނޑައަޅައިފައެވެ.
އަދި މިކަމާއި ގުޅިގެން އަޅަންޖެހޭ ފިޔަވަޅުތަކާއި އަންގަންޖެހޭ އެންގުންތައް ސަރުކާރުގެ ކަމާއި ބެހޭ އިދާރާތަކަށް އަންގަމުން ދާނެ ކަމަށްވެސް ވިސްލްބްލޯވާ ޕްރޮޓެކްޝަން ޔުނިޓުން ވަނީ ބުނެފައެވެ.
