Advertisement

ކުރީގެ ރައީސް އަބްދުﷲ ޔާމީނަށް ސަނާ ނުކިޔާކަމަށް ވިލުފުށީ ދާއިރާގެ ކުރީގެ މެމްބަރު ރިޔާޒް ރަޝީދު ވިދާޅުވެއްޖެ އެވެ.

ސީއެންއެމް ޓީވީގެ "އިތުރުކާފު" ޕްރޮގްރާމުގައި ވާހަކަ ދައްކަވަމުން ރިޔާޒް ވިދާޅުވީ، ކުރީގެ ރައީސް ޔާމީން ކުރެއްވި ބައެއް ކަންތައްތަކަށް އެއްވެސް ވަރަކަށް ތާއީދު ނުކުރާކަމަށެވެ. ރައީސް ޔާމީންގެ ފަރާތުން އެންމެންވެސް ކުރީ ހިތި ތަޖުރިބާ ކަމަށް ރިޔާޒް ވިދާޅުވި އެވެ.

މީގެ އިތުރުން ރިޔާޒް ވިދާޅުވީ، ރައީސް ޔާމީނަށް އެއްވެސް އިރެއްގައި ސަނާ ނުކިޔާކަމަށާއި، ތައުރީފް ކުރީ އެމަނިކުފާނު ކުރެއްވި މަސައްކަތްޕުޅު ތަކަށްކަމަށެވެ.

"ރައީސް ޔާމީނަށް ސަނާ ނުކިޔާނެ އަޅުގަނޑެއް. އަޅުގަނޑު ސަނާ ނުކިޔަން. ކޮށްފަ ހުރި ކަންތައްތަކަށް ތައުރީފް ކުރީ. ތަރައްގީގެ މަޝްރޫއުތަކަށް ތާއީދު ކުރިން. އެކަންތައްތަކުގެ ވާހަކަ އަޅުގަނޑު ދެއްކީ." ރިޔާޒް ރަޝީދު ވިދާޅުވި އެވެ.

ރިޔާޒް ރަޝީދު ވިދާޅުވީ، ރައީސް ޔާމީން ވެރިކަން ހިންގަވަމުން ގެންދެވި ގޮތާއި މެދު އޭރުވެސް ހިތްހަމަ ނުޖެހޭ ކަމަށެވެ. އެހެން ނަމަވެސް ސިޔާސީ މަޝްރަހު ހިގާގޮތް އިނގޭކަމަށް ރިޔާޒް ވިދާޅުވި އެވެ. ރިޔާޒް ރަޝީދު ވިދާޅުވީ އިދިކޮޅުން އެއްޗެއް ބުނާ ކޮންމެ މީހަކާއި މެދު އޭރު އަމަލުކުރިގޮތް ފެންނާނެކަމަށާއި، އޭގެން އެއްވެސް ކަމަކަށް ތާއީދު ނުކުރާކަމަށެވެ.

"އަޅުގަނޑުމެން އޭރުވެސް ބުނިން، މަނީލޯންޑްރިން ގާނޫނު ހެދިއިރު އެއީ ކުރަންވާވަރުގެ ކަމެއް ނޫނޭ. އެކަހަލަ އެތައްބައިވަރު ގާނޫނެއް. ދެކޮޅުހަދާފަ ހުންނާނެ އިނގޭތޯ. ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ، ދެކޮޅުހެދިން." ރިޔާޒް ރަޝީދު ވިދާޅުވި އެވެ.

ރައްޔިތުންގެ މަޖިލީހުގެ މެމްބަރުންގެ ގޮނޑިގެއްލޭގޮތަށް ސުޕްރީމް ކޯޓުން ނިންމި ނިންމުމާއި ގުޅިގެން ރިޔާޒް ވަނީ، އެ އަމުރަކީ އޭރުގެ ބަންޑާރަނައިބު މުހައްމަދު އަނިލް ސުޕްރީމް ކޯޓަށް ވަދެ ވަގަށް ނެރެފައިވާ އަމުރެއް ކަމަށް ތުހުމަތު ކުރައްވާފަ އެވެ.

ޕްރޮގްރާމުގައި ވާހަކަ ދައްކަވަމުން ރިޔާޒް ވަނީ، ރައީސް ޔާމީން ކުރެއްވި ކަންތައްތަކަށް ތާއީދު ނުކުރައްވާކަމަށް ތަކުރާރުކޮށް ވިދާޅުވެފަ އެވެ. އެހެން ނަމަވެސް އެމަނިކުފާނު ގެންނެވި ތަރައްޤީ އާއި އިޤްތިސާދު ކުރިއެރުވުމަށް ކުރެއްވި މަސައްކަތްޕުޅުތަކަކީ އެކަންކަމަށް ފަހުރުވެރިވާ ކަންތައްތައްކަމަށް ރިޔާޒް ވިދާޅުވި އެވެ.