އެ މިނިސްޓްރީން ބުނީ 1903 ވަނަ އަހަރުގެ ޖެނުއަރީ މަހުގެ 2 ވަނަ ދުވަހު އުފަންވި ޓަނަކަ މަރުވީ އޭޕްރީލް މަހުގެ 19 ވަނަ ދުވަހު ކަމަށެވެ.
ގިނީސް ވޯލްޑް ރެކޯޑްސް އިން ބުނީ ޓަނަކަ މަރުވި ހަބަރު ލިބުމުން ހިތާމަކުރާ ކަމަށާއި، އޭނާ މަރުވި ޚަބަރު ސީނިއާ ގެރޮންޓޮލޮޖީ ކޮންސަލްޓަންޓް ރޮބާޓް ޔަންގް ވެސް ކަށަވަރުކޮށްދީފައިވާ ކަމަށެވެ. ރޮބާޓް ޔަންގް އަކީ 2019 ވަނަ އަހަރު ޓަނަކަ އަކީ ދިރިހުރި އެންމެ ދުވަސްވީ މީހާގެ ގޮތުގައި އޭނާގެ ރެކޯޑް ކަށަވަރުކުރުމަށް ވެސް އެހީތެރިވެދިން މީހެކެވެ.
ގިނިސް ވޯލްޑް ރެކޯޑްސް އިން އޭނާގެ މަރާއި ގުޅިގެން ޓްވިޓާގައި ބުނެފައިވަނީ، 2019 ވަނަ އަހަރުގެ ޖެނުއަރީ މަހު ދުނިޔޭގެ އެންމެ ދުވަސްވީ ދިރިހުރި މީހާގެ ގޮތުގައި އޭނާ ރެކޯޑް ކުރެވިފައިވާ ކަމަށެވެ. އޭރު އޭނާގެ އުމުރަކީ 116 އަހަރާއި 28 ދުވަހެވެ.
ޓަނަކަ: ކުރިމަތީ ސަފުގެ މެދުގައި އުމުރުން 32 އަހަރުގައި
ޓަނަކަ އަކީ ދުނިޔޭގެ ތާރީހުގައި ދެވަނައަށް އެންމެ ގިނަދުވަހު ދުނިޔޭގައި އުޅެފައިވާ މީހާއެވެ. އެންމެ ގިނަ ދުވަހު ދުނިޔޭގައި އުޅެފައިވަނީ 122 އަހަރު ވަންދެން ދުނިޔޭގައި އުޅެފައިވާ ޖީން ކެލްމެންޓް އެވެ.
ޓަނާކާގެ އާއިލާއިން މި މަހުގެ ކުރީކޮޅު ކުރި ޓުވީޓެއްގައި ބުނީ ފަހަކަށް އައިސް އޭނާ ވަރަށް ގިނައިން ބަލިވެ އުޅޭ ކަމަށާއި ހޮސްޕިޓަލަށް ވަރަށް ގިނައިން ދާން ޖެހޭ ކަމަށެވެ.
1903 ވަނައަހަރު އުފަންވި ޓަނަކަ މީހަކާ ކައިވެނި ކުރީ އުމުރުން 19 އަހަރުގައި ވިޔަފާރި ކުރާ މީހަކާއެވެ. އުމުރުން 103 އަހަރުވަންދެން މަސައްކަތް ކުރީ އާއިލީ ފިހާރަ ހިންގުމުގައެވެ.
އޭނާ ވަނީ ދެފަހަރަށް ކެންސަރު ބަލިން ސަލާމަތް ވެފައެވެ. އަދި ދުނިޔޭގެ ދެ ބޮޑު ހަނގުރާމައާއި، 1918ގެ ސްޕެނިޝް ފްލޫގެ އިތުރުން ކޮވިޑް ބަލިންވެސް އޭނާ ވަނީ ރައްކާތެރިވެފައެވެ.
