ހެލްތް މިނިސްޓްރީގެ ޑެޕިއުޓީ ޑިރެކްޓަރު ޖެނެރަލް ތަސްލީމާ އުސްމާން ސީއެންއެމްއަށް ވިދާޅުވީ ސަރުކާރަށް ލިބެން ޖެހޭ ބާކީ 60 ވެންޓިލޭޓަރު ހޯދަން ދުބާއީގެ އެގްޒެކިއުޓާސް ކުންފުންޏަށް ފަހު ފުރުސަތު ދީފައިވާ ކަމަށެވެ.
ތަސްލީމާ ވިދާޅުވީ އާބިޓްރޭޝަން މަރުހަލާ ފެށުމުގެ ކުރިން އެކި ފަހަރުގެ މަތިން އެކުންފުންޏާ ގުޅުމަށް މަސައްކަތް ކޮށްފައިވާ ކަމަށެވެ. ނަމަވެސް ކުންފުނިން ފޯނަށް ޖަވާބު ދީފައި ނުވާ ކަމަށެވެ.
އެގްޒެކިއުޓާސް ކުންފުންޏާއެކު ފޭސްޓުފޭސް ބައްދަލުވުމެއް ބާއްވަން ހުށަހަޅާފައިވާތީ މި ބއްދަލުވުން ބާއްވަނީ ކޮން ގައުމެއްގައިތޯ ސީއެންއެމްއިން ސުވާލު ކުރުމުން ތަސްލީމާ ވިދާޅުވީ ހެލްތް މިނިސްޓްރީން އެދިފައިވަނީ އެ ބައްދަލުވުން ރާޢްޖޭގައި ބާއްވަން ކަމަށެވެ.
ވެންޓިލޭޓަރުތައް ގެންނަން ދުބާއީގެ އެގްޒެކިއުޓާސްއާ އެކު އެއްބަސްވި 75 ވެންޓިލޭޓަރުގެ ތެެރެއިން މިހާތަނަށް ލިބިފައިވަނީ އެންމެ 15 ވެންޓިލޭޓަރެވެ. އޭގެ ތެރެއިން ފަސް ވެންޓިލޭޓަރު ފޮނުވިއިރު ބައެއް އާލާތްތައް މަދެވެ. ސަރުކާރަށް ލިބެން ޖެހޭ ބާކީ 60 ވެންޓިލޭޓަރު އަދި ވެސް ނުލިބި ހުރި އިރު އެއްބަސްވުން ހެދި އިރު އެއްވެސް ގެރެންޓީއަކާ ނުލައި އެ ކުންފުންޏަށް ވަނީ އެޑްވާންސަށް 30.91 މިލިއަން ރުފިޔާ ދީފަ އެވެ.
މި މައްސަލަ އާއި ގުޅިގެން ހެލްތް މިނިސްޓަރު އަހުމަދު ނަސީމް މިއަދު ސީއެންއެމް އަށް ވިދާޅުވީ ވެންޓިލޭޓަރު ތަކުގެ މައްސަލަ އާ ގުޅޭ މައުލޫމާތު ވަރަށް އަވަހަށް ހިއްސާ ކުރައްވާނެ ކަމަށެވެ.
ކޮވިޑުގައި ހާލުބޮޑުވާ މީހުންނަށް ފަރުވާ ދިނުމަށް ވެންޓިލޭޓަރު ގަތުމުގައި އޮޅުވާލުންތަކާއި މަކަރާ ހީލަތް ހެދި މައްސަލައިގައި އޭރުގެ ހެލްތް މިނިސްޓަރު އަބްދުﷲ އަމީނާއެކު އެ މިނިސްޓްރީގެ 11 މީހަކަށް ދައުވާ ކުރަން އެންޓި ކޮރަޕްޝަން ކޮޮމިޝަން (އޭސީސީ) އިން ޕީޖީއަށް ފޮނުވި އެވެ.
